Արփինե Հովհաննիսյանի ու նրա գործընկերների կատարած աշխատանքը պետք է իշխանությունն աներ․ Արման Բաբաջանյան․ ՏԵՍԱՆՅՈՒԹ

Factor.am-ի հարցազրույցը «Լուսավոր Հայաստան» խմբակցության պատգամավոր Արման Բաբաջանյանի հետ

– Պարո՛ն Բաբաջանյան, երեկ հրապարակված Վենետիկի հանձնաժողովի աղմկոտ արձանագրության նշված է, թե «Եվրոպայից ժամանած պատվիրակությանի հետ քննարկումների արդյունքում ՀՀ իշխանություններն ընդունել են, որ գործող դատավորների համընդհանուր վեթինգը ո՛չ անհրաժեշտ է, ո՛չ էլ օգտակար։ Եվ պատվիրակությունն ու ՀՀ իշխանությունները համաձայնության են եկել, որ վեթինգի փոխարեն պետք է ուժեղացնել կարգապահական ընթացակարգերը՝ դրանք կապակցելով եկամուտների և գույքի հայտարարագրման համակարգին»։ Ի՞նչ կարծիքի եք այս զարգացումների մասին։

– Այն, ինչ վկայաբերում եք որպես Վենետիկի հանձնաժողովի արձանագրություն, այդպես չէ։ Ներքին կոմունիկացիաներին վերաբերող արձանագրություններ են, որոնք նույնիսկ հրապարակման ենթակա չեն։ Եվ այն, ինչ Արփինե Հովհաննիսյանն ու նրան սպասարկող ՀՀԿ-ական որոշ շրջանակներ տարածում են, որ Վենետիկի հանձնաժողովի արձանագրումն է, այդպես չէ։

– Սահմանափակ տարածման ենթակա այդ արձանագրությունը հրապարակել է «Իրավունքի ուղի» կազմակերպությունը։

– Այո՛, Ռուբեն Մելիքյանի և նրա գործընկերոջ հրապարակած այդ փաստաթուղթը որևէ իրավական ուժ չունի, Վենետիկի հանձնաժողովը դրանով հանդես չի եկել որպես վերջնական եզրահանգում կամ արձանագրում: Ավելին՝ ես համոզված եմ, որ այն աշխատանքը, որը կատարել են Ա.Հովհաննիսյանը, Ռ.Մելիքյանը և նրանց գործընկերները, շատ լավ կլիներ, որ իշխանությունը կատարած լիներ։ Մենք քանիցս նրանց կոչ ենք արել, որ ինտենսիվորեն լծվեն այդ աշխատանքին։ Եվ այդ աշխատանքի բացակայությունն էր նաև պատճառը, որ կա այսպիսի իրավիճակ։ Մենք առաջին իսկ օրից եղել ենք վեթինգի ներդրման ջատագովը և ամենևին այն կարծիքին չենք, որ դրա անվանման փոփոխությամբ կարող է բովանդակությունը փոխվել։

– Ի՞նչ զարգացումներ սպասել արդեն օգոստոսի վերջից, երբ, ինչպես գիտենք, Սահմանադրական դատարանը կքննի նախկին նախագահ Ռոբերտ Քոչարյանի գործը:

– Ռոբերտ Քոչարյանի գործը վարույթ ընդունելով՝ ՍԴ-ն իր այդ որոշմամբ շարունակում է այն գործընթացը, որի հիմքը դրվել է մայիսին և որին հաջորդեցին շատ կտրուկ գործողություններ։ Ես հույս ունեմ, որ Վահե Գրիգորյանի հայտնի նամակի հրապարակումից հետո այս ՍԴ-ի կայացրած որևէ որոշում պիտի վիճարկելի լինի։ Ակնհայտ է, որ այնտեղ կա ճգնաժամ, որը պետք է հանգուցալուծվի։ Այստեղ ԱԺ-ն նույնպես անելիք ունի:

Հարցազրույցն ամբողջությամբ՝ տեսանյութում:

Արմինե Ավետյան