Երկրորդ և երրորդ կարկուտի վնասի չափը դեռ չճշտած՝ նորը տեղաց. Շիրակի մարզում հաշվում են չորրորդ կարկտահարության վնասները

Շիրակի մարզում  հունիսի 27-ին տեղացած կարկուտի հասցրած վնասի չափը դեռ չհաշված՝ հերթական կարկուտը տեղաց։ Հունիսի 29-ի կարկտահարությունը 4-րդ էր մարզում: Հիմնականում տուժել են Անիի, Արթիկի և Ախուրյանի տարածաշրջանները, ընդհանուր թվով՝ շուրջ 10-ը համայնք՝ Մարալիկը, Սառնաղբյուրը, Ձորակապը, Ջրափին, Հայկասարը, Հոռոմը, Լեռնակերտը, Առափին, Հայկավանը, Մարմաշենը։ Մեծապես վնասվել են հացահատիկային և բանջարաբոստանային մշակաբույսերը, ինչպես նաև պտղատու այգիները։ Այս մասին Factor.am-ի հետ զրույցում տեղեկացրեց Շիրակի մարզպետարանի գյուղատնտեսության վարչության պետ Մովսես Մանուկյանը:

Նրա խոսքով՝ այս պահին վնասի չափն են հաշվում: «Վերջին երկու կարկտահարությունների դեպքերի համար հանձնաժողովը երկու խմբով ուսումնասիրություն է անում: Առաջին կարկտահարությունը եղել է հունիսի 4-ին, երեք խոշորացված համայնքներում: Ուսումնասիրությունն արդեն ավարտվել է։ Տուժել է 2.060 հա, վնասը կազմում է 560 մլն դրամ։ Երկրորդ կարկուտի վնասի ուսումնասիրությունը չավարտած՝ երրորդը եկավ, երրորդը չավարտած՝ չորրորդը տեղաց: Հունիսի 27-ին տեղացած կարկուտի վնասի ուսումնասիրությունը կիսատ է մնացել, 14 համայնք էր տուժել, չհասցրինք ավարտել: Հիմա հանձնաժողովները աշխատում են Անիի և Արթիկի տարածաշրջաններում։ Վերջնական արդյունքները մեկ-երկու օրվա մեջ լրիվ պարզ կլինեն»,- ասաց Մովսես Մանուկյանը։

Մարզպետարանի պատասխանատուի խոսքով՝ մարզում եղած 4 կարկտահարության հետևանքով կան տնտեսություններ, որոնք տուժել են 100%-ով, վերականգնում արդեն հնարավոր չէ:

«Կարկտահարություն կա՝ 30, 40, 50% է վնասը, օրինակ՝ բանջարաբոստանային մշակաբույերը կամ կարտոֆիլը: Եթե վնասը մինչև 50% է, ապա կվերականգնվի։ Բայց տարածքներ կան, որ 100 տոկոս կարկտահարված են։ Օրինակ՝ Շիրակ համայնքում, Կառնուտում մինչև 100 տոկոս է վնասը»,- ասաց Մովսես Մանուկյանը։

Կարկուտի հետևանքով վնասների փոխհատուցման մասին խոսելը դեռ վաղ է, գյուղացին պիտի սպասի մինչև սեպտեմբեր:

«Նախարարն ասաց, մի քսան օր առաջ, որ հանրապետության բոլոր տարածաշրջաններից պիտի ունենան վերջնական արդյունքը, այսինքն՝ մոտավորապես սեպտեմբերին կլինի, քանի որ արդեն կարկտահարություններ չեն լինի: Երևի սեպտեմբերի վերջին կունենան ընդհանուր պատկերը և, հնարավոր է, կորոշվի՝ ինչ կարգով կլինի փոխհատուցում կամ չի լինի»,- ասաց Շիրակի մարզպետարանի գյուղատնտեսության վարչության պետը։

Էմմա Չոբանյան