Միջադեպ Երևանի ավագանու նիստում․Անահիտ Բախշյանին ՀՀԿ-ականը դիմել է «Անո»-ով և «պարոն Բախշյան»-ով (տեսանյութ)

Երևանի ավագանու այսօրվա հերթական նիստում միջադեպ է գրանցվել․ ՀՀԿ խմբակցության անդամ Արմեն Սահակյանը «պարոն Բախշյան» և «Անո»-ով է դիմել «Ելք» խմբակցության անդամ Անահիտ Բախշյանին, ինչից հետո «Ելք»-ի անդամները սկսել են վիճաբանել ՀՀԿ-ականների հետ։

«Ելք» խմբակցության ղեկավար Դավիթ Խաժակյանը Factor.am-ի հետ զրույցում ասաց, որ այդ միջադեպը որևէ նախապատմություն չունի․ «Դա պայմանավորված է սեփական վարքագիծը ճիշտ չկազմակերպելու հանգամանքով»,- ասաց նա։

Հիշեցնենք, որ նախկինում ևս Անահիտ Բախշյանի հետ կապված միջադեպ էր արձանագրվել, երբ քաղաքապետ Տարոն Մարգարյանը նիստի ժամանակ բառացիորեն ասել էր․«Ձեր ձենին կարոտ չենք, հերիք եղավ զոհվածների ընտանիքների վրա ձեր PR-ից խոսեք, իյա»:

Դավիթ Խաժակյանը չցանկացավ զուգահեռներ տանել այս դեպքերի միջև: «Սա այլ դեպք է և վերաբերում է անտակտ վերաբերմունքին»,- եզրափակեց նա։

Անահիտ Բախշյանը մեզ հետ զրույցում հրաժարվեց մեկնաբանությամբ հանդես գալ՝ ասելով, որ ժամը 16․00-ին Երևանի քաղաքապետարանում «Ելք» խմբակցությունը մամուլի ասուլիսով է հանդես գալու։

Կատարվածի կապակցությամբ մեկնաբանություն խնդրեցինք ՀՀԿ խմբակցության պատգամավոր Մարգարիտ Եսայանից, ով, սակայն, չցանկացավ հարցի մասին խոսել: Իսկ ահա իրավապաշտպան Զառա Հովհաննիսյանը դատապարտեց կնոջ նկատմամբ նման վերաբերմունքը․ «Կնոջ ինքնությունը վիրավորելու համար դիմել են նաև պարոնով, սա առաջին անգամը չէ․ մի քանի անգամ ՀՀԿ-ականների կողմից է նման վերաբերմունք դրսևորվել Զարուհի Փոստանջյանի հանդեպ։ Նման երևույթն արմատավորում է հայ հասարակության մեջ կնոջ հանդեպ վերաբերմունքի ամբողջ պատկերը։ ԱԺ շատ պատգամավորներ կամ ավագանու անդամներ հաճախ են կանանց հանդեպ անհարգալից վերաբերմունք ունենում»,- ասաց իրավապաշտպանը՝ հավելելով, որ պետք է նման դեպքերը էթիկական չափորոշիչներով կարգավորվեն։

Սեդա Ղուկասյան