04.08.2026 | 10:16
Մոսկվան հայտարարել է, թե նոյեմբերին կարող է քննարկվել ՀԱՊԿ-ում ՀՀ-ին ձայնի իրավունքից զրկելու հարցը
Ինչո՞ւ պետք է 6 տարեկան երեխան անվճար բուժօգնություն ստանա, իսկ 7 տարեկանը՝ վճարովի․ այստեղ տրամաբանություն չկա․ Արսեն Թորոսյանը՝ նոր նախագծի մասին. ՏԵՍԱՆՅՈՒԹ
Տնտեսություն
27.06.2019 | 13:09
Կառավարության նիստին ներկայացված նախագծերից մեկի շրջանակում անվճար բուժօգնություն ստացող երեխաների խմբի մեջ նախատեսվում է 0-18 տարեկան քաղաքացիներին ներառել։ Ինչո՞ւ պետք է 6 տարեկան երեխան անվճար բուժօգնություն ստանա, իսկ 7 տարեկանը՝ վճարովի․ այստեղ տրամաբանություն չկա։
Այս մասին ֆեյսբուքյան ուղիղ եթերի ընթացքում նշեց ՀՀ առողջապահության նախարար Արսեն Թորոսյանը, որն այս պահին գործուղման շրջանակում Շվեյցարիայում է։
«Ծրագրի ընլայնման համար միայն այս տարի 1,75 մլրդ դրամ կծախսվի։ Ծրագրի շարունակությունը մյուս տարվա պետական բյուջեով կկազմակերպվի»,- նշեց առողջապահության նախարարը։
Նրա խոսքով՝ անկախ Հայաստանի պատմության ընթացքում առողջապահության ոլորտում նման լայնածավալ բարեփոխումներ և ֆինանսական ներդրումներ երբևէ չեն եղել, հակառակը՝ առողջապահությունից միշտ գումար է վերցվել։
«Այսօր մենք 12 մլրդ դրամի հավելյալ միջոցների տրամադրում ունենք, որից 9,5 մլրդ դրամը բժշկական ծառայությունների տրամադրման համար է օգտագործվելու, 2,5 մլրդը՝ կապիտալ ծախսերի։ Դրանից 2 մլրդը կտրամադրվի սարքավորումների ձեռքբերման համար, իսկ 500 միլիոնը՝ նախագծերի նախահաշվային փաստաթղթերի ձևակերպմանը, որի արդյունքում հետագայում մոտ 15 բժշկական կենտրոն կվերանորոգվի՝ 13-ը՝ մարզերում, երկուսը՝ մայրաքաղաքում»,- ընդգծեց Արսեն Թորոսյանը։
Ըստ նրա՝ առողջապահության ոլորտում տեղի ունեցող հիմնական փոփոխությունը սրտի վիրահատություններից և նորագույն թանկարժեք տեխնոլոգիաներով մատուցվող ծառայություններից օգտվող քաղաքացիների խմբի ընդլայնումն է։
«Այդ խմբում այսուհետ կներառվեն նաև առաջին և երկրորդ կարգի հաշմանդամություն ունեցողները, ժամկետային և մարտական գործողություններին մասնակցած զինծառայողների ընտանիքի անդամները, ինչպես նաև զոհված զինծառայողների ընտանիքի անդամները։ Փաստացի՝ մենք 230 հազար քաղաքացիների խմբին ևս 500 հազար ենք ավելացնում»,- ընդգծեց նախարարը։
Արսեն Թորոսյանը հավելեց, որ աշխատանքներ են տարվում նաև մանկական նյարդաբուժության և մեծահասակների նյարդավիրաբուժության ծառայությունների որակի բարձրացման ուղղությամբ։
Մանրամասները՝ տեսանյութում:
Նելլի Մելքոնյան
