Քաղաքականություն
08.09.2017 | 17:19Սերժ Սարգսյանի մուտքն անվտանգության ասպարեզ ավարտվեց հոկտեմբերի 27-ի ողբերգությամբ: Այս մասին այսօր լրագրողների հետ հանդիպման ժամանակ հայտարարեց Ազգային անվտանգության նախկին փոխնախարար Գուրգեն Եղիազարյանը՝ անդրադառնալով նախագահ Սերժ Սարգսյանի գործունեությանը:
«Բավական չէ` հրաժարական չեք տալիս, հետն էլ անվտանգության մաման լացացրել եք, հիմա արդեն ձեր մարդկանց միջոցով այլ բաներով եք կերակրում հայ ժողովրդին, որ պառլամենտը ձերն ա, այո՛, պառլամենտը ձերն ա: Էն, ինչ դուք եք արել հայ ժողովրդի գլխին, ոչ մեկը չի արել՝ էդ ձեր ֆուտբոլային դիվանագիտությամբ, էդ ձեր անվտանգ, ապահով Հայաստանով»,- ասուլիսի ընթացքում դիմելով Սարգսյանին՝ հայտարարեց Ազգային անվտանգության նախկին պաշտոնյան:
Ըստ նրա՝ նախագահ Սարգսյանն իր թիմի անդամների միջոցով փորձում է շրջանառել այն տեսակետը, որ երկիրը ղեկավարելու հարցում իրեն փոխարինող չկա: Եղիազարյանը, սակայն, համոզված է՝ անգամ փողոցից ցանկացած մեկը կարող է փոխարինել Սերժ Սարգսյանին:
«Մարդիկ զզվել են ձեզանից, թողեք հանգիստ գնացեք: Կարեն Կարապետյանին բերել եք, հիմա էլ վարկաբեկում եք, դեռ չեք միացրել այդ մեխանիզմը, հեսա կմիացնենք այդ ամբողջ մեխանիզմը և հայ ժողովրդին կտանեք կործանման»,- շարունակեց Գուրգեն Եղիազարյանը հարց ուղղելով Սերժ Սարգսյանին. «Ինչո՞ւ են մարդիկ զենք վերցրել, ընկել ձեր հետևից: Բա մի հատ ձեզ հարց տալի՞ս եք՝ հայ ժողովրդին ի՞նչ եմ արել: Ով քնից զարթնում է, զենք է վերցում, որ գա ձեր հետևից: Հարց տվեք ձեզ, պարոն Սարգսյան, «Սասնա ծռերը» ինչո՞ւ եկան»:
Ի դեպ, ասուլիսին ներկա էր նաև Հանրապետական կուսակցության անդամ Լեռնիկ Ալեքսանյանը, որն ի պատասխան հնչեցված մեղադրանքների՝ բավարարվեց իր անհամաձայնությունը հայտնելով:
Մանրամասները՝ տեսանյութում:
Շողիկ Գալստյան
