Սերժ Սարգսյանը հուշում է քննիչներին՝  իր պարգևատրած երեխան չի կարող հանցագործ լինել

«Հրազդանի քաղաքապետի որդու պարգևատրմամբ Սերժ Սարգսյանը հուշում է քննիչներին, որ իր պարգևատրած երեխան չի կարող հանցագործ լինել, ամեն ինչ կարող է լինել, բայց հանցագործ չի կարող լինել»,- Factor.am-ի հետ զրույցում նման կարծիք հայտնեց Գյումրիի ժուռնալիստների «Ասպարեզ» ակումբի խորհրդի նախագահ Լևոն Բարսեղյանը՝ անդրադառնալով Հրազդանի քաղաքապետի որդու՝ Ռազմիկ Դանիելյանի պարգևատրմանը:

Հիշեցնենք, որ Գիտելիքի և դպրության օրվա կապակցությամբ Սերժ Սարգսյանը 2016-2017 ուստարում բարձր առաջադիմություն ցուցաբերած դպրոցականներին, այդ թվում՝ նաև Ռազմիկ Դանիելյանին, ոսկե մեդալ է հանձնել:

Ըստ Բարսեղյանի՝ նախագահ Սերժ Սարգսյանն այդպես ցանկացել է ցույց տալ, որ ինքը հովանավորում է Հրազդանի քաղաքապետի որդուն:

Հիշեցնենք՝ Հրազդանի քաղաքապետ Արամ Դանիելյանի որդին՝ 17-ամյա Ռազմիկ Դանիելյանը, ծառայողական ավտոմեքենայով ամիսներ առաջ մահացու վրաերթի է ենթարկել 58-ամյա Վալերի Թորոսյանին: Գործով նախաքննությունն այժմ շարունակվում է:

«Ընդհանրապես երբ ՍերԺ Սարգսյանի նման պաշտոնյան զբաղվում է դպրոցականների պարգևատրմամբ դա երկու բան կարող է հուշել, որ երկրում բոլոր  մնացած խնդիրները լուծված են, կամ այդ մարդն իրականությունն ադեկվատ չի ընկալում: Ադեկվատ ընկալում է այն, որ  ինչ-որ պատմության մեջ հայտնված երեխային պետք է արագ փրկել և հրապարակային  ուղերձ է տալիս, որ նա իր պաշտպանյալն է: Մնացածը ադեկվատ չի ընկալում»,- շարունակեց Բարսեղյանը՝ բացառելով, որ Սարգսյանը գուցե տեղյակ չի եղել, որ ոսկե մեդալ ստացածների թվում նաև Ռազմիկ Դանիելյանն է:

«Եթե միամիտ է եղել, կարող է հետ վերցնել իր ստորագրությունն ու ասել, որ իրեն խաբել են իր ենթակաները: Սերժից ամեն ինչ սպասելի է, ամենատարօրինակ մեկնաբանություններն ու հայտարարությունները»,- նշեց Լևոն Բարսեղյանը:

Factor.am-ի հարցին՝ հնարավո՞ր է Հրազդանի քաղաքապետի որդին իրոք գերազանց առաջադիմություն է ցուցաբերել և արժանի է ոսկե մեդալի, Բարսեղյանն ասաց, որ չի բացառվում, ապա շարունակեց. «Ի՞նչ չափանիշներ է օգտագործել նախագահական պալատը այդ երեխաներին ընտրելիս, այդ չափորոշիչները պետք է հրապարակվեին: Բացի այդ, Սերժ Սարգսյանը չպետք է զբաղվեր աշակերտ պարգևատրելով և երրորդ՝  ինչքան էլ լավ սովորող աշակերտ լիներ, Սերժ Սարգսյանը պետք է զերծ մնար այդ քայլից, որը կազդի արդար հետաքննության վրա»:

Մեր զրուցակիցը համոզված է՝ այս ամենից հետո Հրազդանի քաղաքապետի որդու մասնակցությամբ քրեական գործից որևէ ակնկալիք չպետք է ունենալ:

«Հիմա դուք պատկերացնո՞ւմ եք՝ նրան դատեն, Հայաստանում գտնվի մի քննիչ կամ դատավոր, որը Սերժ Սարգսյանի պարգևատրած մարդուն դատի»,- հեգնեց Գյումրիի ժուռնալիստների «Ասպարեզ» ակումբի խորհրդի նախագահը:

Նշենք, որ ավելի վաղ Factor.am-ն  իր՝ «Անպատժելիները. նախկին և ներկա պաշտոնյաներ, որոնց որդիները հայտնվել են աղմկահարույց քրեական գործերում» վերտառությամբ հրապարակմամբ անդրադարձել էր թեմային:

Շողիկ Գալստյան