«ՀԱՊԿ անդամ երկրները վտանգ են տեսնում Հայաստանի ժողովրդավարական գործընթացներից»․ Արթուր Սաքունց. ՏԵՍԱՆՅՈՒԹ

Հարցազրույց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի հետ

– Դուք ունե՞ք բացատրություն, թե ինչու է դատախազությունը գաղտնի պահում գյումրեցի հավաքարար կնոջն սպանած ռուս զինծառայողի անձը և այն, թե որտեղ է գտնվում զինվորը։

-ՀՀ քաղաքացու նկատմամբ բռնություն կատարած ռուս զինվորականը, որի արարքը հանգեցրել է քաղաքացու մահվան, և որի նկատմամբ կիրառվել է կալանքը իբրև խափանման միջոց, արդեն կա տեղեկություն, որ գտնվում է ռուսական ռազմաբազայում։ Այս փաստի վերաբերյալ գլխավոր դատախազի և դատախազության լռությունը որևէ կերպ չենք կարող համարել հիմնավորված և արդարացված։ Եթե մտածում են, թե հերթական անգամ հանրային բողոքի ցույցեր պիտի լինեն, որ անպայման ինչ-որ ձևով գոնե մեկնաբանեն կամ բացատրեն, եթե էդպես շարունակեն՝ կհասնեն նաև դրան։ Ուղղակի չպետք է հղում կատարեն այն բանի վրա, որ իշխանության հանդեպ կա մեծ վստահություն, դրա վրա չպետք է հույս դնել, և մեր դատախազությունը շատ շտապ պետք է հայտարարություն անի բացատրելու համար իր անգործությունը։ ՌԴ դեսպանատունը երկու անգամ հայտարարություն է արել դեպքի առթիվ, իսկ հայկական դատախազությունը գոնե մեկ մեկնաբանություն չի ներկայացրել։

– Դեպքը տեղի էր ունեցել դեկտեմբերի 2-ին։ Հաջորդ օրն արդեն լրատվամիջոցները գրում էին, որ կասկածյալը 102-րդ ռազմաբազայի զինվոր է։ Ինչո՞ւ կասկածյալի ազգության և անձի մասին պաշտոնական հայտարարությունը, ըստ ձեզ, եղավ միայն ընտրություններից հետո։

-Ես, ճիշտն ասած, չգիտեմ։ Ակամայից ենթադրություն է առաջանում, որ դա կարող է պայմանավորված լինել նախընտրական ժամանակահատվածով, բայց դա չէր կարող ազդել նախընտրական մթնոլորտի վրա։ Եթե պարզվի, որ նույնականացված է, իսկ դա քրեական գործերի նյութերին ծանոթանալուց հետո պարզ կլինի, և եթե պարզվի, որ հայտնի է եղել ամսի 3-ին և այդ մասին որպես ճշտված տեղեկություն տարածել են ամսի 9-ից հետո, ապա ես դա կորակեմ որպես վախկոտություն քննչական մարմինների կողմից։ Եթե կարծում եք, որ նման ինֆորմացիայի տարածումը քաղաքական ազդեցություն կունենար ընտրությունների վրա, ապա չարաչար սխալվում են հանրային մեր քաղաքացիների հանդեպ, դա անվստահություն է քաղաքացիների հանդեպ և չեմ կարծում, որ ինֆորմացիայի հրապարակումը կազդեր քվեարկության արդյունքների վրա և կբերեր նախընտրական իրավիճակի սրացման։ Իշխանության լեգիտիմությունը հասարակության շրջանում չափազանց բարձր է և չէր ազդի։

– Դուք խնդիր չե՞ք տեսնում, որ Վլադիմիր Պուտինը Նիկոլ Փաշինյանին չի շնորհավորել խորհրդարանի ընտրություններում տարած հաղթանակի համար՝ այն հիմնավորմամբ, որ հաշտվել է այն մտքի հետ, որ գործ ունի Նոր Հայաստանի հետ։ Վտանգներ չկա՞ն չշնորհավորելու մեջ։

-ՀՀ-ում տեղի ունեցող գործընթացներն իրենց բովանդակությամբ հենց իրենք են վտանգ դառնում ՌԴ համար։ Որովհետև Հայաստանում տեղի ունեցածը իր էությամբ 20 տարի շարունակ ավտորիտար կառավարմամբ և կեղծված ընտրություններով իշխանություն ձևավորելու պրակտիկայի ավարտն էր, ինստիտուցիոնալ վիճակի ավարտն է, որը բնորոշ է հենց ՌԴ-ին և ՀԱՊԿ երկրներին։ Եվ, բնականաբար, ՀԱՊկ-ում կամ ԵՏՄ-ում ունենալ մի պետություն, որը վարքագծով և բովանդակությամբ ոչ միայն տարբերվում է ու հակադրվում այդ պետություններում ձևավորված մոտեցումներից, բնականաբար՝ ի՞նչը ողջունեն։ Ողջունեն ժողովրդավարական ընտրություննե՞րը։

Մանրամասները՝ տեսանյութում:

Մհեր Արշակյան