Շավարշ Քոչարյանը չհստակեցրեց` արդյոք Հայաստանը պատրա՞ստ է զենք գնել Իսրայելից

«Ընդհանուր առմամբ բնական է, որ Հայաստանի և Իսրայելի ժողովուրդների մեջ շատ կան ընդհանրություններ, իհարկե, կան նաև կնճռոտ ծալքեր և շատ կարևոր է, որպեսզի լինի երկխոսություն, որպեսզի այդ ուղղությամբ պետությունները միմյանցից, այնունամենայնիվ, մեկուսացված չլինեն և այդ ուղղությամբ քայլեր են կատարվում»,- այսօր կառավարության նիստից հետո լրագրողների հետ զրույցում անդրադառնալով Իսրայելի տարածաշրջանային հարցերով նախարարի այցին Հայաստան՝ ասաց ՀՀ արտաքին գործերի փոխնախարար Շավարշ Քոչարյանը:

Փոխնախարարը հիշեցրեց, որ ստորագրվել են համաապատասխան համաձայնագրեր, երեկ նշվել է ոչ միայն դիվանագիտական հարաբերությունների հաստատման 25 ամյակը, այլ նաև այդ պետության ազգային տոնը, որտեղ եղել են բավականին մեծ թվով պաշտոնատար անձինք: Ինչ վերաբերում է Իրանի արձագանքին, արտաքին գործերի նախարարի տեղակալն ասաց. «Մենք միշտ ելնում ենք մեր շահերից, երբ կառուցում ենք հարաբերություններ»:

Անդրադառնալով Իսրայելի կողմից Ադրբեջանին զենք վաճառելու խնդրին, Շավարշ Քոչարյանն ասաց, որ Իսրայելի դիրքորոշումը շատ պարզ է, այն հրապարակային հնչել է: «Իսրայելը միշտ պատրաստ է զենք վաճառել ցանկացած պետության, այդ թվում՝ նաև մեզ: Դա արդեն կախված է գնային առաջարկություններից և այլ հարցերից»,- ասաց նա:

Հարցին՝ Հայաստանը պատրա՞ստ է զենք ձեռք բերել Իսրայելից, փոխնախարարը պատասխանեց, թե դա կախված է գնային առաջարկությունից և այլ հարցերից, սակայն չհստակեցրեց՝ դիտարկվո՞ւմ է այդ տարբերակը, թե՞ ոչ:

Հիշեցնենք՝ հուլիսի 25-ին եռօրյա պաշտոնական այցով Հայաստան է ժամանել Իսրայելի տարածաշրջանային համագործակցության նախարար Ցախի Հանեգբին: Իսրայելից ժամանած պաշտոնյան հայտարարել է՝ Իսրայելը ցանկանում է զարգացնել բարեկամական հարաբերությունները Հայաստանի հետ։

Շողիկ Գալստյան