30.10.2026 | 20:47
Դաժան սպանությունից ուղիղ 12 տարի է անցել․ մեղավորներն ազատության մեջ են, վաղեմության ժամկետը՝ մոտ․ ՏԵՍԱՆՅՈՒԹ
Ադրբեջաներեն երգ՝ Թուրքմենստանից Փաշինյանի հրապարակած տեսանյութում
Հասարակություն
09.10.2026 | 13:09
ՀՀ վարչապետ Նիկոլ Փաշինյանը Թուրքմենստանում հեծանվով զբոսանքի ընթացքում տեսանյութ է հրապարակել, որում լսվում է ադրբեջաներեն երգ։ Տեսանյութում լսվում է նաև շատրվանների ձայնը, ինչը թույլ է տալիս ենթադրել, որ երաժշտությունը հնչել է տարածքում, այլ ոչ թե ավելացվել տեսանյութին առանձին։ Դրվագը հայտնվել է ադրբեջանական լրատվամիջոցների և հայաստանյան սոցցանցերի օգտատերերի քննարկումների կենտրոնում։
Տեսանյութում հնչում է 2023 թվականի նոյեմբերին թողարկված «Aram Aram» երգը։ Կատարողը ադրբեջանցի երգչուհի Զեյնաբ Հասանին է։
Այն իրանական ծագում ունեցող երգի ադրբեջաներեն տարբերակն է։ Երգի օրիգինալ տարբերակը հրապարակվել է 2021 թվականի դեկտեմբերին։ Այն կատարում է իրանցի հայտնի փոփ երգիչ Ռեզա Մալեքզադեն։
Ադրբեջանական մի շարք լրատվամիջոցներ անդրադարձել են Նիկոլ Փաշինյանի՝ Թուրքմենստանում նկարահանած տեսանյութին՝ նշելով, որ երաժշտական շատրվանի ֆոնին հնչում է ադրբեջանական «Aram Aram» երգը։ Մասնավորապես, Minval-ը, Caliber.Az-ը և Turkustan.az-ը շեշտել են տեսանյութում հնչող երգի ադրբեջանական ծագումը։ Իսկ Axar.az-ը հրապարակումը վերնագրել է՝ «Փաշինյանն իր առավոտը սկսել է ադրբեջանական երգով»։
Factor TV-ն դիմել է վարչապետի մամուլի խոսնակին՝ պարզելու, թե ինչով է պայմանավորված այս երգի ներքո տեսանյութ հրապարակելը։ Պատասխան ստանալուն պես կհրապարակենք։
Հիշեցնենք, որ Նիկոլ Փաշինյանը Թուրքմենստանում մասնակցում է ԱՊՀ երկրների ղեկավարների գագաթնաժողովին։ Համատեղ լուսանկարահանման ժամանակ վարչապետ Նիկոլ Փաշինյանը կարճ շփվել է Ադրբեջանի նախագահ Իլհամ Ալիևի ու Բելառուսի նախագահ Ալեքսանդր Լուկաշենկոյի հետ։ Տեսախցիկները ֆիքսել են, որ երեկ Փաշինյան-Ալիև կարճ զրույց է տեղի ունեցել նաև սեղանի շուրջ։
Անի Թամրազյան
