Հին եռյակ, նոր դեմքեր «Հայաստան» դաշինքի ցուցակում․ ով է ավելացել, ով՝ դուրս մնացել․ ՏԵՍԱՆՅՈՒԹ

Ռոբերտ Քոչարյան, Իշխան Սաղաթելյան, Աննա Գրիգորյան․ Հայաստան դաշինքի ընտրական ցուցակի առաջին եռյակն այսպիսի տեսք ունի։ Ամբողջական ցանկը հրապարակվել է ՀՀ երկրորդ նախագահ Ռոբերտ Քոչարյանի պաշտոնական էջում։

Factor TV-ն ուսումնասիրել է ներկա և նախկին ցուցակները, համեմատել հայտնի և անհայտ դեմքերին և ցանկում տեղերի բաշխվածությունը։

Առաջին եռյակը նույնն էր նաև 2021-ին, առաջին 10-յակում մյուս անունները դասավորված են հետևյալ հերթականությամբ՝ Սևակ Խաչատրյան, Արթուր Խաչատրյան, Քրիստինե Վարդանյան, Աղվան Վարդանյան, Գեղամ Մանուկյան, Ագնեսա Խամոյան, Լևոն Քոչարյան։  Երկորդ նախագահի որդին 2021-ին ցուցակում 50-րդն էր։ Լևոն Քոչարյանը կալանքի տակ էր, երբ 2023-ին մանդատ ստացավ։ Նախ դաշինքի պատգամավոր Արմեն Չարչյանը հրաժարվեց մանդատից, հաջորդիվ ցուցակի մյուս թեկնածուներ՝ Միհրդատ Մադաթյանը, Անժելա Նալբանդյանը և Գերասիմ Վարդանյանը նույնպես հրաժարվեցին մանդատից:  Արդյունքում պատգամավորական աթոռը հասավ Լևոն Քոչարյանին:

Բագրատ Գալստանյանի քրեական գործով անցնող Արթուր Սարգսյանը, որն այս պահին տնային կալանքի տակ է, 11-րդն է։

Այս տարի դաշինքի առաջին երեսունյակում ընդգրկված է 8 նոր անուններ․ Սևակ Խաչատրյան, Մեսրոպ Մանուկյան, Քրիստինե Նազարյան, Բորիս Թամոյան, Լուսինե Քարամյան, Կարեն Սիմոնյան, Անուշ Առաքելյան, Անուշ Բրուտյան։

Սևակ Խաչատրյանը Վաղարշապատի ավագանու «Հաղթանակ» խմբակցության ղեկավարն է։ «Մայր Հայաստան» խմբակցության ավագանու անդամ Մեսրոպ Մանուկյանը ցուցակում 13-րդն է։ Կարեն Սիմոնյանը Գյումրու ավագանու «Մայր Հայաստան» խմբակցության ղեկավարն է, նա ցուցակում զբաղեցնում է 20-րդ հորիզոնականը։

Ուշագրավ է, որ «Հայաստան» խմբակցության ղեկավար Սեյրան Օհանյանն ցուցակում ընդգրկված չէ, իսկ խմբակցության քարտուղար Արծվիկ Մինասյանը 29-րդն է։  Ցուցակում չկա նաև Արմեն Ռուստամյանի անունը։

Այս անգամ առաջին երեք տասնյակում է հայտնվել նաև հոգեբան Միհրդատ Մադաթյանը, որը 2021-ի պատգամավորների թեկնածուների ցանկում 47-րդ հորիզոնականում էր։

Հայաստան դաշինքի ընտրական ցուցակի առաջին 30 հոգուց միայն 14-ն են ներկայիս պատգամավորներ: Մյուսները կա՛մ նոր դեմքեր են, կա՛մ 2021թ․-ին եղել են ցուցակի ավելի հետին հորիզոնականներում և մանդատ չեն ստացել:

Մանրամասները՝ տեսանյութում։

Անի Թամրազյան