Կմիավորվե՞ն Քոչարյանը, Կարապետյանը և Ծառուկյանը. ընդդիմության շանսերը՝ ըստ վերջին հարցումների. ՏԵՍԱՆՅՈՒԹ

Ռոբերտ Քոչարյանի ղեկավարած «Հայաստան» դաշինքը, ըստ վերջին հարցումների, չի հաղթահարի անցողիկ շեմը՝ խորհրդարանում հայտնվելու համար։ Դաշինքների համար նվազագույն անցողիկ շեմը 8% է, այնինչ, ըստ «Հայաստանի ընտրական համակարգի ուսումնասիրության կենտրոն»-ի հետազոտության, Քոչարյանի թիմը կարող է ստանալ ձայների 4,2 տոկոսը։ IRI-ի՝ Ամերիկյան հանրապետական ինստիտուտի հարցումներով ևս Քոչարյանի վստահության մակարդակը 4 տոկոսի սահմաններում է։ Մեկ այլ հետազոտական ընկերություն՝ «Էմ Փի ՋԻ»-ն, որը 2021-ին Քոչարյանի հաղթանակն էր կանխատեսում, այս անգամ նշում է 5,5 տոկոս վարկանիշի մասին։ «Հայաստան» դաշինքի ներկայացուցիչ, դաշնակցական Իշխան Սաղաթելյանը նշված հարցումներից որևէ մեկը արժանահավատ չի համարում։
«Իրենք 2021 թվականից ինչքան կանխատեսում են արել, սխալ է դուրս եկել։ Մենք վերջին ամիսներին պարբերաբար անում ենք հարցումներ, և այդ հարցումները տարբերվում են Գելափի հարցումներից»,- ասաց Իշխան Սաղաթելյանը։ Ըստ դաշնակցական պատգամավորի՝ իրենց իրականացրած հարցումներով «Հայաստանը» հաղթահարում է անցողիկ շեմը։ Թե ինչ ցուցանիշով՝ Քոչարյանի թիմակիցը չի մանրամասնում։ Այս հարցումների ֆոնին ընտրություններին չմասնակցող Սերժ Սարգսյանի թիմից Քոչարյանին ևս հորդարում են չմասնակցել ընտրություններին և չփոշիացնել ընդդիմության քվեները՝ աջակցելով Սամվել Կարապետյանին։

««Հայաստան» դաշինքի պլաններում չկա ընտրություններին չմասնակցելու սցենար, բացառում եմ։ Ինչո՞ւ չպետք է մասնակցենք։ Լիարժեք գործընթացի մեջ ենք»,- ասաց Սաղաթելյանը։

Վերջին հարցումները ցույց են տալիս, որ ՔՊ-ն թեև առաջատարն է, սակայն այս պահին դեռևս չունի բավարար աջակցություն միանձնյա իշխանություն ձևավորելու համար։ Վճռորոշ կարող են լինել չկողմնորոշված ընտրողների ձայները։ «Ուժեղ Հայաստան»-ը, որն առաջատարն է ընդդիմադիրների շարքում, «Հայաստանի ընտրական համակարգի ուսումնասիրության կենտրոն»-ի տվյալներով ունի 11,4 տոկոս, Հանրապետական ինստիտուտի տվյալներով՝ 9 տոկոս,  «Էմ Փի ՋԻ»-ի տվյալներով՝ 13,4 տոկոս։ Ռուսաստանցի խոշոր գործարար Սամվել Կարապետյանի թիմը այս փուլում չի պատրաստվում միավորվել Քոչարյանի հետ․ արդեն մերժել են Տեր-Պետրոսյանի ՀԱԿ-ի՝ իրենց միանալու առաջարկը։ «Մենք միավորվում ենք նոր ուժերի հետ, որոնք նախկինում իշխանության չեն եղել, չեն կրել պատասխանատվություն ՀՀ ներկա վիճակի համար»,- ասաց կուսակցության խոսնակ Մարիաննա Ղահրամանյան։
Նա չէր բացառել նախկինների հետ համագործակցության այլ ձևաչափերը, սակայն նրա խոսքերից ակնհայտ է դառնում, որ այդ համագործակցության վերջնարդյունքը պետք է լինի Սամվել Կարապետյանի վարչապետ դառնալը։ «Մեզ պետք է, որ ՀՀ-ում իշխանության գա նոր անձ, և դա Սամվել Կարապետյանն է»։
Գագիկ Ծառուկյանի ստեղծած «Նոյան տապան» քաղաքական միավորումը, ըստ «Հայաստանի ընտրական համակարգի ուսումնասիրության կենտրոն»-ի, 3,3 տոկոս քվե ունի։ Հանրապետական ինստիտուտը մարտին 4 տոկոս էր կանխատեսել Ծառուկյանի համար, իսկ «Էմ Փի ՋԻ»-ն՝ շուրջ 8 տոկոս։ Ծառուկյանին միացած «Դեմոկրատական այլընտրանք» կուսակցության նախագահ Սուրեն Սուրենյանցը կարծում է, որ Ծառուկյանը, Քոչարյանը և Կարապետյանը կկարողանան Փաշինյանին իշխանությունից հեռացնել՝ ընտրություններից հետո միավորվելով։
«Ես տեսնում եմ, որ երեք ընդդիմադիր ուժեր բավականին պատկառելի ներկայություն կունենան խորհրդարանում, և իշխանափոխությունը հնարավոր է այդ ճանապարհով։ Մեկ միասնական ցուցակը համարում եմ ուտոպիա»,- ասաց Սուրենյանցը։
Ավելի վաղ Նիկոլ Փաշինյանն այս սցենարով իշխանափոխությունն իրականացնելը համարել էր պատերազմի վերսկսման սպառնալիք։ Նշյալ ուժերն էլ իրենց հերթին վարչապետի այս դիրքորոշումը որակել էին որպես շանտաժ՝ քաղաքացիներին ուղղված։

Մանրամասները՝ տեսանյութում։
Նարեկ Կիրակոսյան