17.02.2026 | 16:59
ՌԴ-ն ՀՀ-ի գործընկերն է, անընդհատ ասել, որ ռուսները եկան մեզ վնաս տալու, վնասակար խոսույթ է. Պապյան․ ՏԵՍԱՆՅՈՒԹ
Թրամփը հայտարարել է, որ «անուղղակիորեն» կմասնակցի Իրանի միջուկային ծրագրի շուրջ բանակցություններին
Քաղաքականություն
17.02.2026 | 10:50
ԱՄՆ նախագահ Դոնալդ Թրամփը հայտարարել է, որ «անուղղակիորեն» կներգրավվի Ժնևում Իրանի և Վաշինգտոնի միջև միջուկային բանակցությունների երկրորդ փուլին, գրում է Al Jazeera-ն։
Իրանի ԱԳ նախարար Աբբաս Արաղչին արդեն Շվեյցարիայում է՝ ԱՄՆ-ի հետ անուղղակի բանակցություններից առաջ հանդիպումներ ունենալու համար։
Հրապարակման մեջ նշվում է, որ Պարսից ծոցի տարածաշրջանում լարվածությունը մնում է բարձր՝ կարևորագույն բանակցություններից առաջ, քանի որ ԱՄՆ-ը տարածաշրջանում տեղակայում է երկրորդ ավիակիրը, իսկ Իրանի գերագույն հոգևոր առաջնորդ այաթոլլահ Ալի Խամենեին զգուշացնում է, որ Իրանի վրա ցանկացած հարձակում կհանգեցնի տարածաշրջանային պատերազմի։
Թրամփը լրագրողներին ասել է, որ երեքշաբթի օրվա քննարկումները նշանակալի են։
«Ես անուղղակիորեն կներգրավվեմ այդ բանակցություններին։ Եվ դրանք շատ կարևոր կլինեն։ Իրանը շատ կոշտ բանակցող է»,- ասել է նա։
Գործարքի հեռանկարների մասին հարցին Թրամփը պատասխանում է, որ Իրանը դասեր է քաղել անցյալ տարվա հունիսին իր կոշտ մոտեցման հետևանքներից, երբ ԱՄՆ-ը միացավ Իսրայելի 12-օրյա պատերազմին Իրանի դեմ և ռմբակոծեց նրա երեք միջուկային օբյեկտները։ Հարձակումները տեղի ունեցան Իրանի և ԱՄՆ-ի միջև Թեհրանի միջուկային ծրագրի շուրջ անուղղակի բանակցությունների ֆոնին և հանգեցրին դրանց խափանման։
Այնուամենայնիվ, Թրամփը ենթադրում է, որ Թեհրանը մոտիվացված է այս անգամ բանակցելու։
«Ես չեմ կարծում, որ նրանք ցանկանում են տեսնել գործարք չկնքելու հետևանքները»,- ասել է ԱՄՆ նախագահը։
Վաշինգտոնը պահանջում է, որ Թեհրանը հրաժարվի իր տարածքում ուրանի հարստացումից և ձգտում է ընդլայնել բանակցությունների շրջանակը՝ ներառելով ոչ միջուկային հարցեր, այլ Իրանի հրթիռային պաշարների հարցը։ Սակայն Թեհրանը, որը պնդում է, որ իր միջուկային ծրագիրը խաղաղ նպատակներ ունի, հայտարարել է, որ պատրաստ է քննարկել իր ծրագրի սահմանափակումները միայն պատժամիջոցների մեղմացման դիմաց։
Ժնև ժամանած Իրանի ԱԳ նախարարը հանդիպել է նաև Ատոմային էներգիայի միջազգային գործակալության ղեկավար Ռաֆայել Գրոսիի հետ՝ տեխնիկական քննարկումների փուլ անցկացնելու համար։ Թեհրանը դադարեցրել էր համագործակցությունը ՄԱԿ-ի վերահսկող մարմնի հետ՝ ԱՄՆ-ի և Իսրայելի կողմից իր միջուկային օբյեկտների վրա հարձակումներից հետո։
ՄԱԳԱՏԷ-ն ամիսներ շարունակ կոչ է անում Իրանին հայտնել, թե ինչ է պատահել իր 440 կգ բարձր հարստացված ուրանի պաշարների հետ իսրայելա-ամերիկյան հարվածներից հետո և թույլ տալ ստուգումները լիովին վերսկսել, այդ թվում՝ ռմբակոծված երեք հիմնական վայրերում՝ Նաթանզում, Ֆորդոյում և Սպահանում։ Թեհրանը թույլատրել է որոշակի մուտք չվնասված վայրեր, սակայն թույլ չի տվել տեսուչներին այցելել այլ վայրեր՝ հղում անելով ճառագայթման հնարավոր ռիսկին։
Թարգմանությունը՝ Էմմա Չոբանյանի
