18.08.2026 | 20:28
ՌԴ ԿԸՀ նախագահը հայտարարել է, որ «երկիրը լքած և դավաճանած» ռուսները պետք է զրկվեն ընտրություններում քվեարկելու իրավունքից
TikTok-ի սեփականատերն ավարտել է ընկերության ամերիկյան ստորաբաժանման վաճառքը
Հաղորդաշարեր
23.01.2026 | 18:48
ByteDance-ը (TikTok-ի չինական սեփականատերը) ավարտել է համատեղ ձեռնարկության՝ TikTok USDS Joint Venture LLC-ի ստեղծումը, որի վերահսկիչ բաժնեմասը կլինի ամերիկյան ընկերությունների սեփականությունը՝ խուսափելու համար ԱՄՆ-ում հայտնի հավելվածի գործունեության արգելքից, գրում է Current time-ը։
Ձեռնարկության մեջ ընդգրկված են երեք կառավարող ներդրողներ՝ Silver Lake-ը, Oracle-ը և Աբու Դաբիում գործող MGX-ը, որոնցից յուրաքանչյուրը տիրապետում է 15% բաժնեմասի: ByteDance-ը կպահպանի 19,9%-ը, մինչդեռ ներդրողների խումբը, այդ թվում՝ Dell-ը, Vastmere Strategic Investments-ը, Alpha Wave Partners-ը և այլք, կպահպանեն մնացած 35,1% բաժնեմասը:
TikTok-ի մամուլի հաղորդագրության համաձայն՝ համատեղ ձեռնարկությունը կգործի որոշակի երաշխիքների ներքո, որոնք ապահովում են ազգային անվտանգությունը՝ ԱՄՆ օգտատերերի համար տվյալների համապարփակ պաշտպանության, ալգորիթմների անվտանգության, բովանդակության մոդերացիայի և ծրագրային ապահովման երաշխիքների միջոցով:
«Ես շատ ուրախ եմ, որ օգնեցի փրկել TikTok-ը։ Այն այժմ կպատկանի մեծ ամերիկացի հայրենասերների և ներդրողների խմբին, որն ամենամեծն է աշխարհում, և կլինի կարևոր ձայն։ Այլ գործոնների հետ մեկտեղ՝ սա նաև այն պատճառն է, որ ես այդքան լավ հանդես եկա երիտասարդների շրջանում 2024 թվականի նախագահական ընտրություններում»,- Truth Social-ում գրել է ԱՄՆ նախագահ Դոնալդ Թրամփը՝ մեկնաբանելով գործարքի ավարտը։
Նա նաև շնորհակալություն է հայտնել Չինաստանի նախագահ Սի Ցզինպինին համագործակցության և գործարքի հաստատման համար, չնայած այն հանգամանքին, որ, ԱՄՆ նախագահի խոսքով, նա «կարող էր այլ կերպ վարվել»։
2024 թվականի ապրիլին ԱՄՆ Կոնգրեսը հաստատել էր TikTok-ն արգելափակելու մասին օրինագիծը, նույն ամսին նախագահ Ջո Բայդենը ստորագրել էր այն։ ԱՄՆ իշխանությունները վախենում էին, որ ByteDance-ը կարող է ստիպված լինել ամերիկացի օգտատերերի տվյալները փոխանցել Չինաստանին, քանի որ Չինաստանի 2014 թվականի հակահետախուզության մասին օրենքն արգելում է ընկերություններին՝ հրաժարվել հետաքննությունների համար անհրաժեշտ տվյալների հավաքագրումից։
Պաշտոնը ստանձնելուց հետո Դոնալդ Թրամփը հրամայել էր հետաձգել TikTok-ի արգելքը և 2025 թվականի սեպտեմբերին ստորագրել գործարքը թույլատրող գործադիր հրամանագիր։
Թարգմանությունը՝ Էմմա Չոբանյանի
