28.10.2026 | 23:23
Քննարկվել են Լուվրի և Հայաստանի պատմության թանգարանի միջև համագործակցության հեռանկարները
Ավստրիայի ու Չեխիայի հավաքականները հայ ըմբիշների հետ համատեղ մարզումներ են անցկացնում Ծաղկաձորում
21.01.2026 | 17:36
Ծաղկաձորի գլխավոր մարզահամալիրը տարեսկզբին հագեցած է մարզական հավաքներով։ Ըմբշամարտի մարզադահլիճում ազատ ու հունահռոմեական ոճերի Հայաստանի հավաքականները մեծաքանակ ըմբիշներով է նախապատրաստվում առաջիկա մրցաշարերին։ Հայ ըմբիշների հետ համատեղ մարզումներ են անցկացնում նաև Ավստրիայի ու Չեխիայի հավաքականները։
Ազատ ոճի ըմբշամարտի Եվրոպայի քառակի չեմպիոն Արսեն Հարությունյանի խոսքով, կարևոր է տարին սկսել ծաղկաձորյան հավաքով։
«Ծաղկաձորում ամենադժվար հավաքներն են տեղի ունենում։ Սպորտային համալիրում շատ լավ պայմաններ են։ Եթե այստեղ լավ հավաք ենք անցկացնում, ապա ամբողջ տարին լավ մարզավիճակում ենք լինում։ Այս տարի ունենք Եվրոպայի ու աշխարհի առաջնություններ, որոնց չեմպիոնությունը նվաճելու համար պետք է ամեն ինչ անեմ»,- ասել է Արսեն Հարությունյանը։
Ավստրիայի հավաքականի մարզիչ Բոդի Յենյոն անդրադարձել է ծաղկաձորյան հավաքին։
«Ես առաջին անգամ եմ Հայաստանում։ Այս մարզաբազան հիանալի է։ Սնունդը շատ համեղ է, մարզադահլիճում ունենք 5 մրցագորգ։ Եղել եմ շատ այլ երկրներում, բայց այստեղ ամեն ինչ այլ է։ Հիանալի է, որ մենք այստեղ ենք ու մարզվում ենք հայ ըմբիշների հետ»,- նշել է Բոդի Յենյոն։
Ըմբշամարտի Հայաստանի հավաքականները տարին կսկսեն Էստոնիայի մայրաքաղաք Տալինում կայանալիք միջազգային մրցաշարով, որը կանցկացվի փետրվարի 6-8-ին։
