07.03.2026 | 16:17
Մարտի 8-ին կայանալիք Մասկատ-Երևան թռիչքի տոմսեր ունեցողները կարող են օգտվել անվճար տեղափոխման հնարավորությունից. դեսպանություն
Արաղչին հայտարարել է, որ ցուցարարներին կախաղան հանելու ծրագիր չկա, իսկ Թրամփին կոչ արել՝ չկրկնել հունիսյան պատերազմի «սխալը»
Քաղաքականություն
15.01.2026 | 12:55
Իրանի արտաքին գործերի նախարար Աբբաս Արաղչին հայտարարել է, որ Թեհրանը «մարդկանց կախաղան բարձրացնելու որևէ ծրագիր չունի», գրում է Al Arabiya-ն։
«Կախաղան հանելու որևէ ծրագիր ընդհանրապես չկա։ Կախաղան բարձրացնելու մասին խոսք անգամ լինել չի կարող»,- Fox News-ին ասել է արտաքին գործերի նախարարը։
Նորվեգիայում գործող Iran Human Rights Society-ի տվյալներով՝ կախաղան բարձրացնելը տարածված երևույթ է իրանական բանտերում։
Երեքշաբթի CBS News-ին տված հարցազրույցում ԱՄՆ նախագահ Դոնալդ Թրամփը հայտարարել էր, որ կձեռնարկի «շատ խիստ միջոցներ», եթե Իրանը սկսի կախաղան բարձրացնել ցուցարարներին, սակայն չէր մանրամասնել իր մեկնաբանությունները։
«Եթե կախաղան բարձրացնեն նրանց, դուք ինչ-որ բաներ կտեսնեք»,- ասել էր Թրամփը։
Այնուհետև Թրամփը հայտարարել է՝ իրեն ասել են, որ Իրանի կառավարության կողմից բողոքի ցույցերի դեմ ուղղված ճնշման ժամանակ սպանությունները նվազում են, և կարծում է՝ ներկայում լայնածավալ մահապատիժների ծրագիր չկա։
Fox News-ի հարցին՝ ի՞նչ կասեր Թրամփին, Արաղչին պատասխանել է. «Մի՛ կրկնիր նույն սխալը, որը թույլ տվեցիր հունիսին։ Իմ ուղերձն սա է. պատերազմի և դիվանագիտության միջև դիվանագիտությունն ավելի լավ միջոց է, չնայած մենք Միացյալ Նահանգներից որևէ դրական փորձ չունենք։ Բայց միևնույն է, դիվանագիտությունը շատ ավելի լավ է, քան պատերազմը»։
Անցյալ տարի Իրանը 12-օրյա պատերազմ ունեցավ ԱՄՆ դաշնակից Իսրայելի հետ, իսկ նրա միջուկային օբյեկտները հունիսին ռմբակոծվեցին ԱՄՆ զինված ուժերի կողմից։
Թարգմանությունը՝ Էմմա Չոբանյանի
