Նաիր Թիկնիզյանը պատմել է, թե ինչու է լաց եղել «Լիլի» դեմ խաղից հետո

Հայաստանի ազգային հավաքականի ու սերբական «Ցրվենա Զվեզդայի» պաշտպան Նաիր Թիկնիզյանը պատմել է, թե երբ է վերջին անգամ լաց եղել։

«Դա «Լիլի» նկատմամբ հաղթանակից հետո էր, և պետք է հարց առաջանար՝ ինչու։ Մինչև օրս ես երեք մրցաշրջան եմ անցկացրել Եվրոպա լիգայում, և ոչ մի հաղթանակ չէի ունեցել։ Իսկ «Լիլի» հետ խաղը, իրականում, շատ ծանր ստացվեց, որովհետև հանդիպումից մի քանի օր առաջ ջերմություն ունեի, հիվանդացել էի։ Բնականաբար, դրա մասին ոչ ոքի չէի ասել, որովհետև դա Եվրոպայի լիգա էր․ դու պարտավոր ես դուրս գալ և խաղալ՝ անկախ ամեն ինչից։ Երկրորդ խաղակեսում արդեն շատ ավելի հեշտ էր, բայց այդ հաղթանակը մեզ շատ թանկ արժեցավ։ Թիմն ամեն ինչ տվեց հաղթանակի համար։

Երբ հնչեց եզրափակիչ սուլիչը, թիմակիցներիցս շատերը տեսան, որ ես հուզմունքից արտասվում էի, շնորհավորեցին հաղթանակի կապակցությամբ։ Բայց դա տևեց մոտ երկու րոպե։ Կարծում եմ՝ լիովին նորմալ է, երբ մարդը կարողանում է արտահայտել իր զգացմունքները»,- Նոբել Առուստամյանի հետ հարցազրույցում ասել է 26-ամյա ֆուտբոլիստը։

Հիշեցնենք, որ «Ցրվենա Զվեզդան» ֆրանսիական «Լիլին» 1։0 հաշվով հաղթել էր Եվրոպա լիգայի 4-րդ տուրում։

Նաիր Թիկնիզյանն այս տարվա ամռանն է Մոսկվայի «Լոկոմոտիվից» տեղափոխվել «Ցրվենա Զվեզդա», որը 1,7 միլիոն եվրո է վճարել տրանսֆերի համար։ Ընթացիկ մրցաշրջանում հայ պաշտպանը սերբական ակումբի կազմում անցկացրել է 25 հանդիպում ու կատարել 2 գոլային փոխանցում։ Նրա պայմանագրի ժամկետը նախատեսված է մինչև 2028թ․ ամառ։