28.10.2026 | 23:23
Քննարկվել են Լուվրի և Հայաստանի պատմության թանգարանի միջև համագործակցության հեռանկարները
Մալխաս Ամոյանը հաղթել է UWW-ի «Տարվա վերադարձ» անվանակարգում․ ՏԵՍԱՆՅՈՒԹ
18.12.2025 | 17:04
Փարիզ-2024 Օլիմպիական խաղերի բրոնզե մեդալակիր, աշխարհի կրկնակի ու Եվրոպայի քառակի չեմպիոն Մալխաս Ամոյանը դարձել է Ըմբշամարտի միջազգային ֆեդերացիայի (UWW) «Տարվա վերադարձ» անվանակարգի հաղթող, հաղորդում է կազմակերպության մամուլի ծառայությունը։
«Ամոյանը բարդ ճանապարհի վրա էր հայտնվել 2021 թվականին Օսլոյում աշխարհի չեմպիոն դառնալուց հետո կրկին ԱԱ-ի ոսկին նվաճելու համար։ 72 կգ քաշային կարգից տեղափոխվելով 77 կգ՝ նա բախվեց դժվարությունների։ 2022 և 2023 թվականների աշխարհի առաջնություններում, ինչպես նաև Փարիզ-2024 Օլիմպիական խաղերում նրան մեկ քայլ բաժանեց իր նպատակից՝ բավարարվելով երեք անընդմեջ բրոնզե մեդալներով։
Բայց 2025 թվականն այլ էր։ 26-ամյա ըմբիշը ցուցադրեց, թերևս, ամենատպավորիչ հունահռոմեական ելույթը Զագրեբի աշխարհի առաջնությունում՝ նվաճելով իր երկրորդ աշխարհի չեմպիոնական տիտղոսը։ Նա անսպասելորեն 9:1 հաշվով վստահ հաղթանակ տարավ գործող օլիմպիական չեմպիոն Նաո Կուսակայի (Ճապոնիա) նկատմամբ»,- նշված է UWW-ի հաղորդագրության մեջ։
«Ես աշխարհի չեմպիոն դարձա 72 կգ քաշային կարգում, բայց, իսկապես, ուզում էի ոսկե մեդալ նվաճել 77 կգ-ում։ Երկու տարի պայքարել եմ վնասվածքների դեմ, ամեն բան չէ, որ ստացվում էր։ Սակայն ուրախ եմ, որ աշխարհի առաջնությունում պատրաստ էի ինչպես հոգեբանորեն, այնպես էլ ֆիզիկապես ու ֆունկցիոնալ առումով։ Աստծո շնորհիվ կարողացա հաղթանակ տանել ու դառնալ աշխարհի կրկնակի չեմպիոն»,- ասել է Մալխաս Ամոյանը։
Հիշեցնենք, որ այս տարի Մալխաս Ամոյանը դարձել էր աշխարհի ու Եվրոպայի չեմպիոն ու հաղթել Վարշավայում կայացած Poland Open մրցաշարում։ Պաշտոնական մրցումներում 26-ամյա ըմբիշը պարտություն չունի 2025 թվականին։
