Ադրբեջանի նախկին փոխվարչապետի նկատմամբ հետախուզում է հայտարարվել հեղաշրջման գործով

Ադրբեջանի նախկին առաջին փոխվարչապետ Աբաս Աբասովի նկատմամբ հետախուզում է հայտարարվել։ Ադրբեջանական լրտավամիջոցների տվյալներով՝ «պետական ​​իշխանությունը զավթելուն ուղղված գործողությունների» վերաբերյալ քրեական գործով հավաքված նյութերի հիման վրա որոշում է կայացվել մեղադրանք առաջադրել Ադրբեջանի նախկին առաջին փոխվարչապետ Աբաս Աբասովին։ Աբասովը 1992 թվականից եղել է Ադրբեջանի առաջին փոխվարչապետ։ 2006 թվականին հրաժարական տալուց հետո նա տեղափոխվել է Ռուսաստան։

Նշվում է, թե  այս ժամանակահատվածում Աբասովը, օգտագործելով տարբեր անօրինական մեթոդներ, զբաղվել է դիվերսիոն գործունեությամբ, որի նպատակն էր վերահսկողություն հաստատել Ռուսաստանում ադրբեջանական սփյուռքի կառույցների նկատմամբ։ Նա 2012 թվականին ստեղծված և բոլորին որպես «Միլիարդատերերի միություն» հայտնի Ռուսաստանի ադրբեջանական կազմակերպությունների միության հիմնադիրն ու ղեկավարն էր։

Ըստ կառավարամետ լրատվամիջոցների՝ դեռևս 2012 թվականից տեղեկություններ էին շրջանառվում, որ «Միլիարդատերերի միության» ստեղծումն ուղղված էր Ադրբեջանի քաղաքական գործընթացներին միջամտելուն: Ըստ գործի նյութերի՝ տարբեր ուղիներով Ադրբեջան փոխանցված միջոցները, այդ գործարքների աուդիո և վիդեո ձայնագրությունները և այդ ժամանակ գործընթացի մասնակիցներին տրված խոստումները, ինչպես նաև արտերկրում կայացած հանդիպումները և Ադրբեջանում սահմանադրական պետական ​​իշխանության բռնի զավթման ծրագրերի վերաբերյալ առգրավված նյութերը ներառվել են քրեական գործի մեջ և լայնորեն ներկայացվելու են բաց դատական ​​նիստում։

Ադրբեջանում վերջին օրերին  այս գործով ձերբակալվել են ընդդիմադիր «Ժողովրդական ճակատ» կուսակցության  նախագահ Ալի Քերիմլին, նախագահության անդամ Մամեդ Իբրահիմը, մի քանի այլ կուսակցական պաշտոնյաներ և Գեդաբեյի շրջանի գործադիր իշխանության նախկին ղեկավար Սալեհ Ռուստամովը։ Բաքվի Սաբայիլի շրջանային դատարանը 2 ամիս 15 օր ժամկետով կալանավորել է Ալի Քերիմլիին:

Ադրբեջանի նախագահի աշխատակազմի նախկին ղեկավար Ռամիզ Մեհդիևն էլ տնային կալանքի տակ է և մեղադրվում է իշխանության բռնի զավթման ու պետական դավաճանության մեջ։

Թարգմանությունը՝ Էմմա Չոբանյանի