Ալիևը հայտարարել է, որ Հնդկաստանը փորձում է վրեժ լուծել Ադրբեջանից միջազգային հարթակներում

Չինաստանի Տյանցզին քաղաքում Շանհայի համագործակցության կազմակերպության գագաթնաժողովի շրջանակում  Ադրբեջանի նախագահ Իլհամ Ալիևը հանդիպել է Պակիստանի  վարչապետ Շահբազ Շարիֆի հետ։ Ադրբեջանական կողմի փոխանցմամբ՝ Շարիֆը երախտագիտություն է հայտնել Ալիևին այս տարվա ապրիլ-մայիս ամիսներին «Պակիստանի դեմ Հնդկաստանի կողմից իրականացված ռազմական ագրեսիայի ժամանակ ցուցաբերված քաղաքական աջակցության և համերաշխության համար»։

Ալիևն էլ ասել է, թե Պակիստանին աջակցությանն ի պատասխան՝ Հնդկաստանը փորձում է վրեժ լուծել Ադրբեջանից միջազգային հարթակներում։

Նա նաև շեշտել է, որ քայլեր են ձեռնարկվում եռակողմ՝ Ադրբեջան-Թուրքիա-Պակիստան ձևաչափով քննարկված հարցերը կյանքի կոչելու ուղղությամբ։

Պակիստանի վարչապետը շնորհավորել է Ալիևին Ադրբեջանի և Հայաստանի միջև հարաբերությունների կարգավորման գործընթացում ձեռք բերված արդյունքների համար՝ նշելով, որ դա պատմական նշանակություն ունի։

Հանդիպման ընթացքում անդրադարձ է կատարվել Ադրբեջանի և Պակիստանի միջև միջկառավարական հանձնաժողովի գործունեությանը, քննարկումներ են անցկացվել առկա քաղաքական հարաբերությունների ոգով տնտեսական և առևտրային հարաբերությունների զարգացման վերաբերյալ, ինչպես նաև կառավարության անդամներին տրվել են լրացուցիչ հանձնարարականներ։ Դրական քայլ է գնահատվել Պակիստանում «ASAN xidmət»-ի նման մոդելի ներդրման նախագիծը, որը գործում է Ադրբեջանում։

Հավելենք, որ ավելի վաղ միջազգային լրատվամիջոցները հայտնել էին, որ հնդիկները չեղարկում են Թուրքիայի և Ադրբեջանի հանգստավայրերում ծրագրած արձակուրդները՝ Պակիստանին այս երկրների աջակցության պատճառով։

Հիշեցնենք, որ Հնդկաստանի և Պակիստանի միջև հարաբերությունները կտրուկ վատթարացել էին մայիսին հնդկական Քաշմիրում տեղի ունեցած մահացու հարձակումից հետո, որը, ըստ Նյու Դելիի, աջակցվել է Իսլամաբադի կողմից։

Թարգմանությունը՝ Էմմա Չոբանյանի