ՌԴ նախագահը չի բացառում Վլադիմիր Զելենսկիի հետ հանդիպման հնարավորությունը․ Պեսկով

ՌԴ նախագահի մամուլի քարտուղար Դմիտրի Պեսկովը հայտարարել է, որ Ռուսաստանի և Ուկրաինայի նախագահներ Վլադիմիր Պուտինի և Վլադիմիր Զելենսկիի հանդիպման նախապատրաստական փորձագիտական ​​աշխատանքը դեռևս «չի եռում», սակայն Ռուսաստանը պահպանում է իր հետաքրքրությունն ու պատրաստակամությունը նման բանակցությունների հարցում, գրում է Ինտերֆաքսը։

«Պուտինը չի բացառում նման հանդիպման անցկացման հնարավորությունը, սակայն կարծում է, որ ամենաբարձր մակարդակով ցանկացած հանդիպում պետք է լավ պատրաստված լինի, որպեսզի այն կարողանա ավարտին հասցնել այն աշխատանքը, որը նախ պետք է իրականացվի փորձագիտական ​​մակարդակով։ Մենք դեռ չենք կարող ասել, որ փորձագիտական ​​աշխատանքը եռում է, ցավոք՝ ոչ։ Մենք պահպանում ենք մեր հետաքրքրությունն ու պատրաստակամությունը նման բանակցությունների հարցում»,- լրագրողներին ասել է Պեսկովը։

Նա այսպես է մեկնաբանել Գերմանիայի կանցլեր Ֆրիդրիխ Մերցի խոսքերը, որը կասկած է հայտնել, որ Պուտինի և Զելենսկի միջև հանդիպումը կարող է տեղի ունենալ։

«Մեր բոլոր դիրքորոշումները փոխանցվել են, հիմնական դրույթները (կարգավորման վերաբերյալ) գրավոր տեսքով  փոխանցվել են ուկրաինական կողմին։ Այո, անհրաժեշտ է հետագա քննարկում»,- հավելել է Պեսկովը։

Անցյալ շաբաթվա սկզբին Պուտինի հետ հեռախոսազրույցից հետո ԱՄՆ նախագահ Դոնալդ Թրամփը հայտարարել էր, որ մշակվում է Ռուսաստանի և Ուկրաինայի նախագահների հանդիպման ծրագիրը: Կրեմլը, իր հերթին, միայն հայտարարել էր պատվիրակությունների մակարդակը բարձրացնելու պատրաստակամության մասին, սակայն գործնական քայլեր չէր արել։

Ուկրաինայի նախագահ Վլադիմիր Զելենսկին էլ հայտարարել է, որ ռուսները բացասական ազդանշաններ են տալիս հանդիպումների և հետագա զարգացումների վերաբերյալ։

Թարգմանությունը՝ Էմմա Չոբանյանի