Պուտինի ու Զելենսկիի հանդիպումը «ակնհայտորեն չի կայանա»․ Մերց

Ռուսաստանի կողմից Ուկրաինայի դեմ սանձազերծած պատերազմը դադարեցնելու ջանքերում պետք է ելնել նրանից, որ այդ երկրների նախագահներ Վլադիմիր Զելենսկիի և Վլադիմիր Պուտինի միջև անձնական հանդիպում չի կայանա։ Այս մասին հայտարարել է Գերմանիայի կանցլեր Ֆրիդրիխ Մերցը Ֆրանսիայի նախագահ Էմանուել Մակրոնի հետ կայացած հանդիպման ժամանակ, գրում է DW-ի ռուսական ծառայությունը։

«Մենք այսօր կրկին պետք է անդրադառնանք այդ հարցին՝ ելնելով այն  փաստից, որ նախագահ Զելենսկիի և նախագահ Պուտինի միջև հանդիպումն ակնհայտորեն տեղի չի ունենալու»,- ասել է Մերցը՝ խոսելով շարունակական դիվանագիտական ​​ջանքերի մասին։

Նա նշել է, որ դա «տարբերվում է նախագահ Թրամփի և նախագահ Պուտինի միջև անցյալ շաբաթ համաձայնեցվածից» և Վաշինգտոնում Թրամփի հետ հանդիպման ժամանակ քննարկվածից։

Անցյալ շաբաթվա սկզբին Պուտինի հետ հեռախոսազրույցից հետո Թրամփը հայտարարել էր, որ մշակվում է Ռուսաստանի և Ուկրաինայի նախագահների հանդիպման ծրագիրը: Կրեմլը, իր հերթին, միայն հայտարարել էր պատվիրակությունների մակարդակը բարձրացնելու պատրաստակամության մասին։

Մերցն ավելի վաղ հայտարարել էր, որ Մոսկվան այս հարցում դիմում է «ձգձգման ռազմավարության»՝ հանդիպման հաստատումը կապելով որոշակի նախնական պայմանների հետ։

«Պուտինը կարծում է, որ ճիշտ է այս հանդիպումը կապել նախնական պայմանների հետ, որոնք, Ուկրաինայի տեսանկյունից և մեր տեսանկյունից, իմ անձնական տեսանկյունից, բացարձակապես անընդունելի են»,- ընդգծել է Գերմանիայի կառավարության ղեկավարը։

Նմանատիպ կարծիք նախկինում հայտնել էր Գերմանիայի արտաքին գործերի նախարար Յոհան Վադեֆուլը, որը կասկածանքով է մոտենում Մոսկվայի բանակցությունների պատրաստակամությանը։

«Ես լուրջ կասկածներ ունեմ, որ Ռուսաստանի և Ուկրաինայի միջև բանակցություններ ընդհանրապես տեղի կունենան մոտ ապագայում»,- ասել էր Վադեֆուլը։

Թարգմանությունը՝ Էմմա Չոբանյանի