Ռուսաստանը «զգալի զիջումների» է գնացել Ուկրաինայի հարցում․ Վենս

Ռուսաստանը «զգալի զիջումներ» է արել Դոնալդ Թրամփին՝ կապված իր պահանջների հետ Ուկրաինայում պատերազմի դադարեցման համար։ Այս մասին հայտարարել է ԱՄՆ փոխնախագահ Ջեյ Դի Վենսը՝ նախապես ձայնագրված հարցազրույցում, որը հեռարձակվել է NBC ամերիկյան հեռուստաալիքով կիրակի օրը՝ օգոստոսի 24-ին։

Վենսի խոսքերով՝ ԱՄՆ նախագահը «շատ ագրեսիվ, շատ էներգետիկ դիվանագիտություն» է վարում թե՛ Մոսկվայի, թե՛ Կիևի հետ՝ պատերազմն ավարտին հասնելու համար՝ փորձելով գտնել փոխզիջումային լուծում։

«Կարծում եմ՝ ռուսները զգալի զիջումներ են արել նախագահ Թրամփին առաջին անգամ այս 3,5 տարվա հակամարտության ընթացքում։ Նրանք իրապես պատրաստ էին ճկունություն ցուցաբերել իրենց որոշ հիմնական պահանջների հարցում»,-նշել է Վենսը։

Մասնավորապես, ըստ ԱՄՆ փոխնախագահի, Մոսկվան ընդունել է, որ «Ուկրաինան կպահպանի տարածքային ամբողջականություն պատերազմից հետո»։ Նա չմանրամասնեց, թե կոնկրետ որ տարածքներն է Ռուսաստանը պատրաստ թողնել Կիևի վերահսկողության ներքո ռազմական գործողությունների դադարեցումից հետո։ Բացի այդ, նրա խոսքով, Ռուսաստանը «ընդունել է, որ չի հաջողվի Կիևում հաստատել մարիոնետային ռեժիմ»։

«Կրկին, բոլոր զիջումներն արե՞լ են։ Իհարկե ոչ։ Բայց մենք հասնում ենք առաջընթացի»,-նշել է Վենսը։

Վերջում ԱՄՆ փոխնախագահը ևս մեկ անգամ հաստատել է, որ ամերիկացի զինվորականները Ուկրաինայում չեն գտնվի, սակայն Վաշինգտոնը ակտիվ դեր է խաղալու անվտանգության երաշխիքների ապահովման գործում։

Նրա խոսքերով՝ Թրամփը ավելի մեծ տնտեսական ճնշում է գործադրել Կրեմլի վրա՝ պատերազմը կանգնեցնելու համար, «քան Բայդենը երեք տարվա ընթացքում»։

«Վերջիվերջո մենք կամ կհասնենք հաջողության, կամ կհասնենք փակուղու։ Եվ եթե փակուղու հասնենք, կշարունակենք բանակցությունների և ճնշման գործընթացը։ Սա ակտիվ դիվանագիտություն է, որը պետք է վերջ դնի այս պատերազմին»,-ասել է ԱՄՆ փոխնախագահը։

Նա վստահություն է հայտնել, որ Մոսկվան չի փորձում ձգձգել Ուկրաինայի շուրջ հնարավոր խաղաղ համաձայնագրի ձեռքբերումը։