«Ուժով սահմանների փոփոխությունը անհնար է»․ Եվրոպայի առաջնորդները աջակցել են Կիևին՝ Թրամփի և Պուտինի հանդիպման նախօրեին

Ուկրաինայի ապագայի վերաբերյալ բանակցությունները չեն կարող անցկացվել առանց նրա մասնակցության և մինչ հրադադարի հաստատումը, իսկ Ռուսաստանի համար տարածքային զիջումները՝ որպես խաղաղության պայման, բացառված են։ Այս մասին համատեղ հայտարարությամբ հանդես եկան եվրոպական երկրների առաջնորդները՝ ուկրաինական ղեկավարության հետ շաբաթ օրը անցկացված բանակցությունների և խորհրդակցությունների արդյունքներով, փոխանցում է BBC-ի ռուսական ծառայությունը։

Այս հայտարարությունը պատասխանում է ԱՄՆ նախագահ Դոնալդ Թրամփին, որը նախատեսում է օգոստոսի 15-ին ԱՄՆ-ում հանդիպել Վլադիմիր Պուտինի հետ՝ քննարկելու Ուկրաինայում պատերազմի ավարտի հեռանկարները։ Թրամփը նախօրեին հայտարարել էր, որ դրա համար Մոսկվան և Կիևը պետք է իրականացնեն «տարածքների փոխանակում»։

Եվրոպական երկրների առաջնորդներն ու Եվրահանձնաժողովի նախագահը հանդես եկան համատեղ հայտարարությամբ՝ հրապարակելով Եվրոպայում Ուկրաինայի դաշնակիցների միասնական դիրքորոշումը՝ ԱՄՆ և Ռուսաստանի նախագահների՝ օգոստոսի 15-ին Ալյասկայում կայանալիք հանդիպման նախօրեին։

Կոմյունիկեն հրապարակվեց շաբաթ օրը ուշ երեկոյան՝ մեկ օր անց այն բանից հետո, երբ Դոնալդ Թրամփը հայտարարեց Վլադիմիր Պուտինի հետ հանդիպման վայրն ու ամսաթիվը՝ Ուկրաինայի հետ պատերազմի ավարտի հեռանկարները քննարկելու նպատակով։ Թրամփի վարկածով՝ դրա համար, մասնավորապես, անհրաժեշտ կլինի Մոսկվայի և Կիևի միջև «տարածքների փոխանակում»։

Թրամփը այդ ժամանակ հստակ չնշեց, թե ինչ նկատի ունի, սակայն Wall Street Journal-ի աղբյուրները, որոնք ծանոթ են Թրամփի հատուկ ներկայացուցիչ Սթիվ Ուիթքոֆի և Պուտինի միջև օգոստոսի 6-ին Մոսկվայում կայացած բանակցությունների արդյունքներին, պատմել են լրագրողներին, որ Պուտինը, իբր, պատրաստ է հրադադարի՝ Դոնեցկի և Լուգանսկի մարզերից Ուկրաինայի հրաժարվելու պայմանով, որոնք մեծ մասամբ գտնվում են Ռուսաստանի վերահսկողության տակ։