Ռուսական հարվածների հետևանքով Կիևում վնասվել են բնակելի շենքեր, մետրոյի կայարանի մուտքը. զոհվել է մեկ մարդ, կան տուժածներ

Ռուսական զորքերը հուլիսի լույս 21-ի գիշերը հարվածել են Ուկրաինային 426 ԱԹՍ-ով, 5 X-47 M2 «Կինժալ» աերոբալիստիկ հրթիռներով, 14 X-101 թևավոր հրթիռներով, 4 «Կալիբր» թևավոր հրթիռներով և 1 «Իսկանդեր-Կ» թևավոր հրթիռով: Այս մասին հայտնում է Ուկրաինայի ռազմաօդային ուժերի հրամանատարությունը, փոխանցում է Current time-ը։

Ուկրաինացի զինվորականների տվյալներով՝ խոցվել կամ ճնշվել է 224 օդային հարձակման միջոց։ Գրանցվել է 23 հարվածային ԱԹՍ-ի հարված երեք վայրում, ինչպես նաև խոցված անօդաչու թռչող սարքերի անկումը 12 վայրում։

Կիևի քաղաքային վարչակազմի ղեկավար Տիմուր Տկաչենկոն հայտնել է, որ Դարնիցկի շրջանում հարձակման հետևանքով հրդեհ է բռնկվել բազմահարկ շենքի և ոչ բնակելի շինության տանիքում, ինչպես նաև սուպերմարկետում։ Շևչենկովսկի շրջանում հրդեհվել է բնակելի շենք, բազմահարկ շենքի պատշգամբներ, Դնեպրովսկի շրջանում՝ առևտրի կենտրոններ, անօդաչու թռչող սարքի բեկորներն ընկել են մանկապարտեզի տարածքում, Սոլոմենսկի շրջանում հրդեհներ են տեղի ունեցել ոչ բնակելի շենքում և պահեստներում։

Բացի այդ, Կիևում վնասվել է մետրոյի «Լուկյանովսկայա» կայարանի մուտքը: Տեղական իշխանությունների տվյալներով՝ կայարանը փակ է, գնացքներն անցնում են առանց կանգառների: Մետրոյի մյուս կայարանները գործում են սովորական ռեժիմով:

Տկաչենկոյի տեղեկացմամբ՝ Կիևում մեկ մարդ է զոհվել։ Ուկրաինայի ոստիկանությունը հայտնում է քաղաքի Դարնիցկի և Շևչենկովսկի շրջաններում վեց տուժածի  մասին։

Ուկրաինայի մայրաքաղաքի վրա հարձակման հետևանքով մեկ մարդ զոհվել է, յոթը՝ վիրավորվել, այդ թվում՝ 15-ամյա աղջիկ, հայտնել է Կիևի քաղաքապետ Վիտալի Կլիչկոն։

«Հինգ տուժած հոսպիտալացվել է, երկուսին բժիշկները տեղում բուժօգնություն են ցուցաբերել»,  գրել է նա տելեգրամի իր ալիքում։

Իվանո-Ֆրանկովսկի երեք գյուղում վնասվել են ենթակառուցվածքները։ Քաղաքի քաղաքապետ Ռուսլան Մարցինկիվը հայտնել է, որ գյուղերից մեկի որոշ տներում պատուհաններ են կոտրվել։

«Կան տուժածներ։ Նախնական տվյալներով՝ բոլորը ողջ են, թեթև վնասվածքներ են ստացել»,- նշել  է նա։

Թարգմանությունը՝ Էմմա Չոբանյանի