Կոչ եմ անում քաղաքացիներին Սահմանադրության նախագծին քննադատորեն մոտենալ և դիտարկումներ անել․ Գալյան․ ՏԵՍԱՆՅՈՒԹ

Արդարադատության նախարար Սրբուհի Գալյանը լրագրողների հետ զրույցում մանրամասներ հայտնեց նոր Սահմանադրության նախագծի մշակման ընթացքի և դրա հրապարակման ժամկետների մասին։

Նախարարը տեղեկացրեց, որ Սահմանադրական բարեփոխումների խորհրդում տեքստի ավելի քան 90-95%-ն արդեն քննարկվել է․ «Տեքստի հրապարակումը նախատեսվում է ընթացիկ ամսվա ընթացքում՝ հնարավոր է՝ մինչև ամսվա կեսը կամ վերջը։ Մինչ այդ նախատեսվում է անցկացնել Խորհրդի ևս մեկ նիստ։ Նախագիծը, ինչպես և խոստացվել էր, պատրաստ է եղել դեռևս մարտ ամսին, սակայն հետաձգվել է բուն հրապարակումը՝ տեքստի լավարկման և լրացուցիչ քննարկումների նպատակով»։

Արձագանքելով դիտարկմանը, թե ովքեր կարող են ծանոթանալ տեքստին, Գալյանն ասաց․ «Սահմանադրության տեքստը երբ հրապարակվի, ով ուզում է՝ թող ծանոթանա, բայց կարևորն այն է, որ հայ ժողովուրդը ծանոթանա, որպեսզի կարծիք կազմի նոր տեքստի վերաբերյալ»։

Սրբուհի Գալյանը հատուկ ընդգծեց, որ հրապարակվելիք փաստաթուղթը դեռևս սոսկ նախագիծ է, և կոչ արեց հանրությանը ակտիվորեն ներգրավվել դրա քննարկմանը․ «Իմ խնդրանքն ու կոչն է քաղաքացիներին՝ հրապարակվելիք տարբերակին վերաբերվել որպես նախագծի և դրան մոտենալ քննադատաբար՝ ներկայացնելով իրենց դիտարկումներն ու առաջարկությունները։ Մեր նպատակն է հանրային լայն քննարկումների արդյունքում ունենալ հնարավորինս կոնսենսուսային տարբերակ, որն էլ հետագայում կդրվի հանրաքվեի»։

Անդրադառնալով Խորհրդում ընդդիմադիր ներկայացուցիչների մասնակցությանը՝ Գալյանը ողջունեց «Ուժեղ Հայաստան» խմբակցության կողմից թեկնածուի առաջադրումը՝ հերքելով ներքին հակասությունների մասին լուրերը և հույս հայտնելով, որ վերջինս ավելի հաճախ կմասնակցի նիստերին։

Մանրամասները՝ տեսանյութում։

Ռոզա Վարդանյան