Միավորված ընդդիմության ուժերը պահանջում են բացահայտել Արսեն Գևորգյանի մահվան հանգամանքները

Միավորված ընդդիմությունը համատեղ հայտարարություն է տարածել «Ուժեղ Հայաստան» կուսակցության՝ Ստեփանավանի ՏԻՄ ընտրությունների թեկնածու Արսեն Գևորգյանի՝ «Նուբարաշեն» քրեակատարողական հիմնարկում մահվան դեպքի առնչությամբ՝ պահանջելով բացահայտել դեպքի հանգամանքները, ապահովել արդարադատությունն ու վերականգնել արդարությունը։

Հայտարարության հեղինակները Գևորգյանի մահվան պատասխանատվությունը վերագրում են իշխանություններին և իրավական համակարգի ներկայացուցիչներին՝ տեղի ունեցածը որակելով որպես քաղաքական հետապնդումների հետևանք։

Նրանք խստորեն դատապարտել են քաղաքական հաշվեհարդարի մթնոլորտը, կոչ արել քաղաքական ուժերին և հասարակական դերակատարներին դատապարտել դեպքը, ինչպես նաև միջազգային կառույցներին ու դիվանագիտական ներկայացուցչություններին՝ գնահատական տալ Հայաստանում մարդու իրավունքների խախտումներին և քաղաքական հետապնդումներին։

Հայտարարության հեղինակները նշել են, որ Արսեն Գևորգյանի մահը վերահաստատում է ժողովրդավարական ազատությունների և իրավունքների վերականգնման անհրաժեշտությունը։

Հիշեցնենք, որ Արսեն Գևորգյանը կալանավորվել էր ընթացիկ տարվա հոկտեմբերի 21-ին՝ ընտրակաշառք տալու մեղադրանքով։ Նոյեմբերի 10-ի վաղ առավոտյան «Նուբարաշեն» քրեակատարողական հիմնարկում նրա ինքնազգացողությունը վատացել էր։ Քրեակատարողական ծառայության փոխանցմամբ՝ հերթապահ բուժակը նրան առաջին բուժօգնություն է ցուցաբերել, ապա հրավիրվել է շտապօգնություն, որի բուժանձնակազմը ժամը 08։30-ի սահմաններում արձանագրել է նրա կենսաբանական մահը։ ՔԿԾ-ն նաև հայտնել է, որ քրեակատարողական հիմնարկում գտնվելու ընթացքում Գևորգյանը առողջական վիճակի հետ կապված գանգատներ չի ներկայացրել։