03.07.2026 | 22:52
Ուրախ ենք աջակցել Մեծ Բրիտանիա-Հայաստան ռազմավարական գործընկերության իրականացմանը. դեսպան
Իտալիայի դեսպանն իր գոհունակությունն է հայտնել Դիլիջանում հայ-իտալական միջազգային հյուրընկալության դպրոց բացելու նախաձեռնությանը
21.07.2025 | 10:26
ՀՀ-ում Իտալիայի Հանրապետության դեսպան Ալեսանդրո Ֆերանտին Իտալիայի դեսպանատանը հյուրընկալել է հեղինակավոր Apicius միջազգային հյուրընկալության դպրոցի ներկայացուցիչ Մասիմո Բոկուսին։ Վերջինս դեսպանատանը հյուրընկալվել է այս աշնանը Դիլիջանում բացվող Apicius Armenia նոր միջազգային հյուրընկալության դպրոցի պաշտոնական բացման նախապատրաստական աշխատանքների շրջանակներում:
Հանդիպման ընթացքում ընդգծվել է Իտալիայի և Հայաստանի միջև կրթական գերազանցության և մշակութային փոխանակման խթանման համատեղ հանձնառությունը: Դեսպան Ֆերանտին իր աջակցությունն է հայտնել Apicius Armenia-ի առաջիկա բացմանը, որը մշակվում է տեղական և միջազգային հաստատության հետ համագործակցությամբ՝ տարածաշրջան բերելու համաշխարհային մակարդակի հյուրընկալության և խոհարարական կրթություն:
«Apicius Armenia-ն ներկայացնում է մեր երկու երկրների միջև համագործակցության նոր և կարևոր գլուխ: Այս նախաձեռնությունը ոչ միայն ամրապնդում է կրթական և մշակութային կապերը, այլև հիմք է դնում նորարարության և մասնագիտական աճի համար՝ Հայաստանի զբոսաշրջության և հյուրընկալության ոլորտներում: Մենք ուրախ ենք աջակցել մի նախագծի, որը արտացոլում է իտալական լավագույն փորձը՝ միաժամանակ արձագանքելով Հայաստանի դինամիկ ապագային», – նշել է դեսպան Ֆերանտին
Հյուրընկալության կառավարման, սննդի և գինու ուսումնասիրությունների մասնագիտացված միջազգային հյուրընկալության դպրոց Apicius Armenia-ն, շուտով կբացի իր դռները Դիլիջանում: Այն կծառայի որպես համանուն իտալական հանրահայտ կրթական հաստատության հայկական մասնաճյուղ:
Apicius Armenia-ն տարածաշրջանի ուսանողներին կառաջարկի հյուրընկալության կառավարման, խոհարարական արվեստի, գինու ուսումնասիրությունների և այլ ոլորտներում համաշխարհային ճանաչում ունեցող դասընթացների հնարավորություն՝ հիմնված Իտալիայի Ֆլորենցիա քաղաքի Apicius դպրոցի ակադեմիական չափանիշների վրա:
Նախագիծը կնպաստի Հայաստանի՝ որպես կրթության, զբոսաշրջության և ներդրումների համար զարգացող ուղղության հեղինակության աճին, միաժամանակ պատրաստելով մասնագետների նոր սերունդ՝ համաշխարհային հյուրընկալության ոլորտում հաջողության հասնելու համար:
