ՀՅԴ անդամ Ալեքսան Ասատրյանը կալանավորվել է

ՀՅԴ անդամ Ալեքսան Ասատրյանը 2 ամսով կալանավորվել է, այս մասին Factor.am-ին տեղեկացրին ՔԿ-ից:

«Ա.Ա.-ի նկատմամբ հարուցվել է հանրային քրեական հետապնդում՝ Քրեական օրենսգրքի 335-րդ հոդվածի 1-ին մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառություն): Նրա նկատմամբ որպես խափանման միջոց կիրառվել է կալանքը»,- մանրամասնեցին իրավապահ կառույցից:

Օրեր առաջ խուզարկություններ էին կատարվել ՀՅԴ մի շարք անդամների բնակարաններում։ ՔԿ-ն հայտնել էր, որ ահաբեկչության նախապատրաստության դեպքի առթիվ նախաձեռնված քրեական վարույթի շրջանակներում 7 անձ ձերբակալվել է, որոնցից մեկի նկատմամբ հարուցվել է հանրային քրեական հետապնդում՝ Քրեական օրենսգրքի 43-308-րդ հոդվածի 1-ին մասով՝ ահաբեկչության նախապատրաստություն։ ՔԿ-ի հաղորդմամբ՝ իրականացրած քննչական և վարութային գործողությունների, այդ թվում՝ մի շարք հասցեներում կատարված խուզարկությունների արդյունքում հայտնաբերվել են էլեկտրական անդրապայթիչ, որը նախատեսված է հեռավար գործարկելու համար, դրա բաղկացուցիչ մասեր, մարտական նռնակ, մարտական նռնակի պայթուցիչ (запал), վառոդ, ռադիոկապի միջոցներ, քննության համար հետաքրքրություն ներկայացնող այլ իրեր և առարկաներ։ Իր հերթին ՀՅԴ-ից էլ հայտարարել էին, որ դաշնակցականների տների խուզարկության արդյունքում որևէ ապօրինի առարկա չի հայտնաբերվել, առգրավված բոլոր զենքերը օրինական են։ Նշենք նաև, որ այս գործով ՀՅԴ անդամ Անդրանիկ Չամիչյանը նախօրեին կալանավորվել էր երկու ամսով։

Ի դեպ, Factor.am-ի տեղեկություններով` խուզարկության արդյունքում իրավապահները մարտական «Ֆ1» տեսակի նռնակ հայտնաբերել են Ալեքսան Ասատրյանի տնից:

Մանյա Պողոսյան