07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Պետդեպարտամենտը, Թրամփի վարչակազմի ծրագրի շրջանակներում, աշխատանքից ազատում է ավելի քան 1300 աշխատակցի
Քաղաքականություն
12.07.2025 | 10:49
ԱՄՆ Պետդեպարտամենտը հուլիսի 11-ին աշխատանքից ազատել է ավելի քան 1300 աշխատակցի։ Այս մասին հաղորդում է Associated Press-ը՝ հղում անելով Պետդեպարտամենտի բարձրաստիճան պաշտոնյայի։
Գերատեսչությունը կրճատման ծանուցումներ է ուղարկել Միացյալ Նահանգներում ծառայող 1107 պետական ծառայողի և 246 արտաքին ծառայության աշխատակցի։ Ըստ գերատեսչության բարձրաստիճան պաշտոնյայի, որը խոսել է անանունության պայմանով, նախքան անհատական ծանուցումներ ուղարկելը, աշխատակիցները էլեկտրոնային փոստով են ծանուցվել։
Նշվում է, որ աշխատակիցները հարկադիր արձակուրդի կգնան 120 օրով, ապա պաշտոնապես կազատվեն աշխատանքից։ Պետական ծառայողների մեծ մասի համար, սակայն, արձակման ժամկետը 60 օր է։
«Գերատեսչության վերակազմակերպման հետ կապված… գերատեսչությունը կհեշտացնի ներքին գորառույթները՝ կենտրոնանալով դիվանագիտական առաջնահերթությունների վրա», – ասվում է ծանուցման մեջ։
Նշվում է, որ անձնակազմի կրճատումը մանրազնին քննարկվել է՝ հաշվի առնելով ավելորդ կամ միևնույն գործառույթները կատարող ստորաբաժանումները։
Մինչ նախագահ Դոնալդ Թրամփը, պետքարտուղար Մարկո Ռուբիոն և նրանց հանրապետական դաշնակիցները գովաբանում են կրճատումները՝ դրանք համարելով վաղուց սպասված և անհրաժեշտ, դրանք սուր քննադատության են ենթարկվել ներկա և նախկին դիվանագետների կողմից, որոնք պնդում են, որ կրճատումները կթուլացնեն ԱՄՆ ազդեցությունը արտերկրում՝ առկա և ի հայտ եկող սպառնալիքներին դիմակայելու համար։
Թրամփի վարչակազմը ձգտում է բարեփոխել ամերիկյան դիվանագիտությունը և ակտիվորեն աշխատում է դաշնային կառավարության չափը կրճատելու ուղղությամբ, այդ թվում՝ կառավարության արդյունավետության դեպարտամենտի կողմից նախաձեռնված զանգվածային կրճատումների և ամբողջ գործակալությունների, ինչպիսիք են ԱՄՆ միջազգային զարգացման գործակալությունը և Կրթության դեպարտամենտը, լուծարման քայլերի ուղղությամբ։
ԱՄՆ Միջազգային զարգացման գործակալությունը, որը գործել է շուրջ վեց տասնամյակ, անցյալ շաբաթ միացվել է Պետդեպարտամենտին, այն բանից հետո, երբ վարչակազմը կտրուկ կրճատել է ֆինանսավորումը։
Մայիսին Պետդեպը Կոնգրեսին էր ներկայացրել վերակազմակերպման ծրագիր, որն առաջարկում էր ԱՄՆ ծրագրերը կրճատել 18%-ով՝ նախապես հայտարարված 15%-ի փոխարեն։ Նշվում է նաև, որ վերակազմակերպումը կազդի ավելի քան 300 բյուրոների և գրասենյակների վրա։
Թարգմանությունը` Էմմա Չոբանյանի
