Քաղաքականություն
11.07.2025 | 19:30ՀՀ ԱԺ «Հայաստան» խմբակցության պատգամավոր, դաշնակցական Գառնիկ Դանիելյանը, Factor TV-ի հետ զրույցում անդրադառնալով երկրում տեղի ունեցող քաղաքական գործընթացներին և իշխանության վարած քաղաքականությանը, պնդում է, որ Փաշինյանը նպատակադրված կերպով քայլեր է իրականացնում, որոնց վերջնական նպատակը «Հայաստանը թուրքական վիլայեթի կամ ադրբեջանական «գուբերնիայի վերածելն է»։
Դանիելյանի կարծիքով` իշխանության պահվածքն ուղղակիորեն վտանգում է պետականությունը։ Նրա խոսքով, ՀՅԴ-ի նկատմամբ այսօր վարվող քաղաքականությունը նույնպես թելադրված է Ադրբեջանի կողմից․ «ՀՅԴ-ի հետ այդպես են վարվում նաև Ադրբեջանի պահանջով։ Ես բացառում եմ, որ մենք զենք օգտագործենք պետության դեմ»։
Դանիելյանը համարում է, որ իշխանությունը հանձնարարել է «Քաղաքացիական պայմանագիր» կուսակցության անդամներին «մրոտել» իրեն և «ցեխ շպրտել»։ «Գուցե վաղը ասեն՝ մեկուսացրե՛ք Գառնիկ Դանիելյանին։ Եթե Սամվել Կարապետյանին կարող են ազատազրկել, ինչո՞ւ ինձ չպետք է անեն»,- հարցնում է նա։
Դանիելյանը, անդրադառնալով իշխանության կողմից հայտարարված հեղաշրջման փորձի կանխմանը, խոսեց ՔԿ-ի հրապարակած ձայնագրություններում հնչող դրվագի մասին, որտեղ խոսվում է երթևեկությունը կաթվածահար անելու համար ավտոմեքենաների վրա ներկ լցնելու մասին․ «Ներկով ակցիա է եղել․ ես, օրինակ, մեքենայիս վրա ներկ եմ լցնում՝ ցույց տալու, որ իշխանության ձեռքերն արյունոտ են։ Ո՞վ է ասում, թե ներկը երթևեկության ընթացքում պետք է լցվեր մեքենայի վրա։ Ներկը չի վառվում»։
Անդրադառնալով նույն գործի շրջանակներում հայտարարված տեղեկությանը, թե Բագրատ արքեպիսկոպոս Գալստանյանի կեցավայր տարբեր մարդիկ են այցելել և գործողությունների պլան քննարկել, Դանիելյանն ասաց, որ հարյուրավոր մարդիկ այնտեղ են գնացել և բազմաթիվ քննարկումներ անցկացրել։
Դանիելյանը վստահ է՝ իշխանությունը շարունակելու է «իր և մյուս ընդդիմադիրների դեմ արշավները», սակայն ինքը պատրաստ է ցանկացած ճնշման ու պատասխանատվության։
Մանրամասները՝ տեսանյութում։
Նարեկ Կիրակոսյան
