Քաղաքականություն
20.06.2025 | 13:38
ՌԴ փոխվարչապետ Ալեքսեյ Օվերչուկը «Վեդոմոստի»-ին տված հարցազրույցում հայտարարել է, թե Հայաստանի՝ Եվրամիության հետ մերձեցման կուրսը արդեն իսկ վնասում է հանրապետության տնտեսությանը։
Նրա խոսքով՝ Հայաստանի անդամակցությունը ԵՏՄ-ին հանգեցրել է զգալի տնտեսական աճի. մեկ շնչի հաշվով ՀՆԱ-ն 2014 թվականի 3850 դոլարից աճել է մինչև ավելի քան 8500 դոլար 2024 թվականին։ ԵՏՄ-ի հետ փոխադարձ առևտուրը հասել է 12.7 միլիարդ դոլարի, մինչդեռ ԵՄ-ի հետ՝ ընդամենը 2.3 միլիարդ դոլար է։
«Հայաստանի տնտեսական հաջողությունը ԵՏՄ-ի շրջանակներում փոխգործակցության մոդելի առավելությունների ցուցադրումն է», – ընդգել է Օվերչուկը։ Օվերչուկի խոսքով՝ «ԵՄ-ի ուղղությամբ շարժվելու պատճառով ռուսական բիզնեսն ավելի զգույշ է դարձել». 2024 թվականին առևտրաշրջանառությունը նվազել է 2 միլիարդ դոլարով, իսկ 2025 թվականին կորուստները կարող են հասնել 6 միլիարդ դոլարի։ 26 միլիարդ դոլար ՀՆԱ ունեցող երկրի համար սա նշանակում է 23% կորուստ։
«Եվ սա միայն ռուսական բիզնեսի արձագանքն է հայկական քննարկմանը», – նշել է ՌԴ փոխվարչապետը՝ նկատի ունենալով ԵՄ-ին անդամակցության հայտ ներկայացնելու մասին քննարկումները։
Նա նշել է, որ հնարավոր չի լինի միաժամանակ լինել ԵՄ-ում և ԵՏՄ-ում ու առաջարկել Հայաստանի քաղաքացիներին պատկերացնել, թե ինչպես կազդի ԵՄ-ի օգտին ընտրությունը իրենց կյանքի վրա։ Նա կանխատեսել է Ռուսաստան ուղիղ չվերթների փակում (2022 թվականին Բրյուսելը փակել է ԵՄ երկինքը ռուսական ավիաընկերությունների համար): «Դա կբարդացնի հարազատների մոտ ուղևորությունները և կնվազեցնի Ռուսաստանից զբոսաշրջիկների հոսքը»,- հայտարարել է նա։
Ըստ Օվերչուկի՝ բեռնափոխադրողները ստիպված կլինեն սահմանին վերամիավորել բեռնատարները, ինչպես հիմա անում են եվրոպական և ռուսական փոխադրողները. «Հայկական բեռնատարները կգան Վերին Լարս, կվերամիավորվեն և կվերադառնան Հայաստան»։
Օվերչուկը նաև ուշադրություն է հրավիրել ապրանքների հավաստագրման հայկական նոր կանոնների վրա։ Նա կանխատեսել է, որ երրորդ երկրներից ապրանքների ներմուծման պարզեցումը մրցակցություն կստեղծի տեղական արտադրողների համար և կստիպի ԵՏՄ-ին խստացնել սահմանային վերահսկողությունը, ինչը կբարդացնի հայկական ապրանքների արտահանումը Ռուսաստան։
ՌԴ փոխվարչապետի դիտարկմամբ՝ Ռուսաստանը կհարգի Հայաստանի ժողովրդի ընտրությունը, սակայն ԵՄ-ի հետ մերձեցումը «անխուսափելիորեն կհանգեցնի Ռուսաստանի և Հայաստանի միջև լիակատար խզման»։
«Արդյո՞ք հայերը դա են ցանկանում։ Սա այն հարցն է, որին նրանք պետք է պատասխանեն», – հայտարարել է Օվերչուկը։
Թարգմանությունը՝ Էմմա Չոբանյանի
