Քաղաքականություն
20.05.2025 | 23:58
ԵՄ արտաքին քաղաքական գերատեսչության ղեկավար Կայա Կալասը հայտարարել է, որ դաշինքի արտաքին գործերի նախարարները պայմանավորվել են 5.5 միլիոն եվրո հատկացնել «Ազատություն» ռադիոկայանին։ Այս մասին փոխանցում է Euronews-ը։
Կալասի խոսքով՝ կարճաժամկետ արտակարգ ֆինանսավորումը անվտանգության համակարգ է անկախ լրագրության համար:
Կալասն ասել է, որ ԵՄ-ն չի կարողանա լրացնել կազմակերպության ֆինանսավորման դեֆիցիտը ամբողջ աշխարհում, սակայն այն կարող է օգնել հեռարձակողին «աշխատել և գործել այն երկրներում, որոնք գտնվում են ԵՄ հարևանությամբ և որոնք մեծապես կախված են դրսից եկող նորություններից»:
Հիշեցնենք, որ մարտի 14-ին ԱՄՆ նախագահ Դոնալդ Թրամփը գործադիր հրաման է ստորագրել յոթ պետական գերատեսչությունների, այդ թվում՝ Միացյալ Նահանգների Գլոբալ լրատվամիջոցների գործակալության (USAGM) գործունեությունը դադարեցնելու մասին։ Այն պատասխանատու է արտասահմանյան հեռարձակման համար և, ի թիվս այլնի, վերահսկում է «Ազատ Եվրոպա/Ազատություն» ռադիոկայանը: Դրան հաջորդել է ԱՄՆ Կոնգրեսի կողմից հաստատված «Ազատ Եվրոպա/Ազատություն» ռադիոկայանի դրամաշնորհային ֆինանսավորումը դադարեցնելու մասին ծանուցումը: USAGM-ն իր կայքում հրապարակել է հայտարարություն՝ բացատրելով, որ ընդունված որոշումները, Թրամփի վարչակազմի տեսանկյունից, անարդյունավետ են հարկատուների միջոցները ծախսելու հարցում: Այս որոշումից հետո ԵՄ մի քանի երկրների ներկայացուցիչներ հանդես են եկել առաջարկով՝ աջակցել մեդիա կորպորացիային՝ ամբողջությամբ կամ մասնակի իրենց վրա վերցնելով դրա ֆինանսավորումը։
«Ազատություն» ռադիոկայանը մարտի 18-ին հայց էր ներկայացրել ԱՄՆ Գլոբալ լրատվամիջոցների գործակալության դեմ։ USAGM-ը համաձայնել էր տրամադրել «Ազատություն» ռադիոկայանի՝ Կոնգրեսի դրամաշնորհի մի մասը մինչ դատարանը քննում է գործը։
