09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
USAGM-ը համաձայնել է տրամադրել «Ազատություն» ռադիոկայանի՝ Կոնգրեսի դրամաշնորհի մի մասը, մինչ դատարանը քննում է գործը
Քաղաքականություն
25.03.2025 | 15:16
ԱՄՆ Գլոբալ մեդիաների գործակալությունը (USAGM) համաձայնել է «Ազատ Եվրոպա/Ազատություն» ռադիոկայանին տրամադրել Կոնգրեսի կողմից հատկացված միջոցների մի մասը: Այս մասին հայտնի է դարձել մարտի 24-ին՝ «Ազատություն» ռադիոկայանի՝ գործակալության ղեկավարության դեմ հայցի վերաբերյալ նախատեսված դատական նիստի նախօրեին։ Հայցը բխում է «Ազատ Եվրոպա/Ազատություն» ռադիոկայանի ֆինանսավորումը դադարեցնելու USAGM-ի փորձի հետ, գրում է Current time-ը։
Սա նշանակում է, որ «Ազատություն» ռադիոկայանը կստանա 7,46 միլիոն դոլար․ գումար, որն ընդգրկում է մարտի 1-ից մինչև մարտի 14-ն ընկած ժամանակահատվածը։
«Գործակալությունը ձեռնարկել է անհապաղ վարչական քայլեր՝ վճարումը սկսելու համար»,- ասվում է USAGM-ի հայցադիմումում ներկայացված նամակում: Նշվում է, որ միջոցները պետք է փոխանցվեն մինչև մարտի 26-ը, իսկ «Ազատություն» ռադիոկայանը դրանք կստանա մինչև ամսվա վերջ։
Մարտի 24-ին կայացած դատական նիստում ԱՄՆ Արդարադատության դեպարտամենտի ներկայացուցիչ Էբիգեյլ Սթոութը, ելույթ ունենալով USAGM-ի անունից, ասել է, որ գործակալության դրամաշնորհային համաձայնագիրը «Ազատություն» ռադիոկայանի հետ, Միջազգային հեռարձակման մասին օրենքի համաձայն, թույլ է տալիս USAGM-ին դադարեցնել ֆինանսավորումը, եթե մեդիա կորպորացիան չի կատարում համաձայնագրի պայմանները:
«Ազատություն» ռադիոկայանի փաստաբան Դեյվիդ Զիոնթսն ասել է, որ «իմաստ չէր լինի», եթե Կոնգրեսը հաստատեր ֆինանսավորումը հենց այնպես, որ «գործակալությունները կարողանան անել այն, ինչ ուզում են»:
«Ազատ Եվրոպա/Ազատություն» ռադիոկայանը շարունակում է պահանջել 2025 թվականի բյուջետային տարվա համար նախատեսված դրամաշնորհի վճարումը, որը նախատեսված է մինչև 2025 թվականի սեպտեմբերի 30-ը։ Մեդիա կորպորացիան նաև միջնորդություն է ներկայացրել՝ ֆինանսավորումը դադարեցնելու վերաբերյալ նախնական արգելանքի դեմ։ Սպասվում է, որ դատավոր Ռոյս Լամբերթն այս հարցի վերաբերյալ որոշում կկայացնի առաջիկա շաբաթների ընթացքում:
Հիշեցնենք, որ «Ազատություն» ռադիոկայանը մարտի 18-ին հայց էր ներկայացրել ԱՄՆ Գլոբալ լարտվամիջոցների գործակալության դեմ։
Թարգմանությունը՝ Էմմա Չոբանյանի
