«Ազատ Եվրոպա/Ազատություն» ռադիոկայանը դատի է տվել ԱՄՆ Գլոբալ լրատվամիջոցների գործակալությանը

«Ազատ Եվրոպա/Ազատություն» ռադիոկայանը հայց է ներկայացրել ԱՄՆ Գլոբալ լրատվամիջոցների գործակալության (USAGM) և կազմակերպության պաշտոնյաների՝ Քերի Լեյքի և Վիկտոր Մորալեսի դեմ՝ ապարգելափակելու Կոնգրեսի կողմից հաստատված դրամաշնորհը, որը ֆինանսավորում է կազմակերպության աշխատանքը, գրում է Current time-ը։

Բողոքում ասվում է, որ Կոնգրեսի կողմից հատկացված «Ազատություն» ռադիոկայանի միջոցների տրամադրման մերժումը խախտում է դաշնային օրենքները, ներառյալ՝ ԱՄՆ Սահմանադրությունը, որը Կոնգրեսին բացառիկ լիազորություն է տալիս դաշնային ծախսերի նկատմամբ: Հայցը կքննվի ԱՄՆ Կոլումբիայի շրջանային դատարանում:

«Հիմա ժամանակը չէ զիջելու Ամերիկայի թշնամիների քարոզչությանը և գրաքննությանը: Մենք կարծում ենք, որ օրենքը մեր կողմն է, և որ ամբողջ աշխարհի բռնակալները վաղաժամ տոնում են մեր մահը»,- ասել է «Ազատություն» ռադիոկայանի նախագահ Սթիվեն Կապուսը:

Հիշեցնենք, որ մարտի 14-ին ԱՄՆ նախագահ Դոնալդ Թրամփը գործադիր հրաման է ստորագրել յոթ պետական ​​գերատեսչությունների, այդ թվում՝ Միացյալ Նահանգների Գլոբալ լրատվամիջոցների գործակալության (USAGM) գործունեությունը դադարեցնելու մասին։ Այն պատասխանատու է արտասահմանյան հեռարձակման համար և, ի թիվս այլնի, վերահսկում է «Ազատ Եվրոպա/Ազատություն» ռադիոկայանը:

Դրան հաջորդել է ԱՄՆ Կոնգրեսի կողմից հաստատված «Ազատ Եվրոպա/Ազատություն» ռադիոկայանի դրամաշնորհային ֆինանսավորումը դադարեցնելու մասին ծանուցումը: USAGM-ն իր կայքում հրապարակել է հայտարարություն՝ բացատրելով, որ ընդունված որոշումները, Թրամփի վարչակազմի տեսանկյունից, անարդյունավետ են հարկատուների միջոցները ծախսելու հարցում: Այս որոշումից հետո ԵՄ մի քանի երկրների ներկայացուցիչներ հանդես են եկել առաջարկով՝ աջակցել մեդիա կորպորացիային՝ ամբողջությամբ կամ մասնակի իրենց վրա վերցնելով դրա ֆինանսավորումը։

Թարգմանությունը՝ Էմմա Չոբանյանի