22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Factor TV-ի արձանագրումից հետո ՔԿ-ն կուսումնասիրի ոստիկանի կողմից քաղաքացու ձեռքին հարվածելու դրվագը
Հասարակություն
28.04.2025 | 18:14
Ապրիլի սկզբին պարեկների կողմից բռնության ենթարկված Էդգար Այվազյանը տուժողի կարգավիճակում ներկայացել է Քննչական կոմիտե և հայտնել, որ բողոքներ չունի։ Այս տեղեկությունը Factor.am-ի հետ զրույցում հայտնեց ինքը՝ Էդգար Այվազյանը։
Հիշեցնենք՝ համացանցում տարածվել էր մի տեսանյութ, որում ոստիկանության ծառայողներն ավտոմեքենայից բռնի կերպով իջեցնում են Այվազյանին և «փռում» ասֆալտին։ Պարեկային ծառայողները մոտենում են մեքենային, բացում դուռը և քաշքշելով դուրս են հանում վարորդին։ Մինչ այդ, սակայն, հեռակա երկխոսություն է ընթանում վարորդի՝ Էդգար Այվազյանի և պարեկների միջև։ Պարեկները մեքենայի ուղղությամբ են սկսում գնալ վարորդի կողմից հնչող ինչ-որ արտահայտությունից հետո, որը լսելի չէ։ Վարորդին բռնի կերպով մեքենայից դուրս է հանում պարեկային չորս ծառայող։ Քաղաքացուն գցում են գետնին. տեսանելի է, որ պարեկներից առնվազն մեկը ծնկով հենվում է ասֆալտին պառկած վարորդի վրա, մյուսը ձեռնաշղթաներ է հագցնում։ Այս ֆոնին անցնում է պաշտոնական ավտոշարասյուն։
Ավելի վաղ հայտնել էինք, որ Քննչական կոմիտեն քրեական գործ է հարուցել բռնություն գործադրելով կամ բռնություն գործադրելու սպառնալիքով պաշտոնատար անձի կողմից իշխանական կամ ծառայողական լիազորությունները չարաշահելու կամ լիազորություններն անցնելու հոդվածով:
Factor.am-ն արձանագրել էր, որ քաղաքացուն մեքենայից դուրս բերելն ու ասֆալտին տապալելն այդ կարճ հոլովակի միակ ուշագրավ դրվագը չէ։ Քիչ հեռու ոստիկանության ծառայողը բռնություն է կիրառում տեղի ունեցողը նկարահանող մեկ այլ քաղաքացու նկատմամբ։ Նա մոտենում է հեռախոսով նկարահանող քաղաքացուն և երկու անգամ հարվածում այն ձեռքին, որով պահում է հեռախոսը։ Քաղաքացին շարունակում է նկարահանել, նրան մոտենում է մեկ այլ ծառայող, որի ձեռքին մահակ կա և այն թափահարելով ինչ-որ բան է ասում քաղաքացուն։ Այս ճնշումներից հետո քաղաքացին դադարեցնում է նկարահանումը։ Factor.am-ը գրավոր հարցեր էր ուղղել գլխավոր դատախազ Աննա Վարդապետյանին։
Հետաքրքրվել էինք՝ արդյո՞ք ուսումնասիրվում է այդ դրվագը։ Քննչական կոմիտեից պատասխանելով մեր հարցմանը՝ հայտնել են, որ վերոնշյալ գործի նախաքննության ընթացքում, նաև՝ Factor.am-ի արձանագրած դրվագը քննության առարկա կդարձնեն։
Նարեկ Կիրակոսյան
