02.08.2026 | 14:28
9-րդ գումարման Ազգային ժողովի անդրանիկ նիստը. ՈՒՂԻՂ
Մարկո Ռուբիոն և Սերգեյ Լավրովը հեռախոսազրույց են ունեցել
Քաղաքականություն
18.04.2025 | 11:23
ԱՄՆ պետքարուղար Մարկո Ռուբիոն և ՌԴ ԱԳ նախարար Սերգեյ Լավրովը հեռախոսազրույց են ունեցել։ ԱՄՆ Պետքարտուղարության խոսնակ Թեմի Բրյուսի տարածած հաղորդագրության մեջ նշվում է, որ Ռուբիոն իր ռուսաստանցի գործընկերոջը փոխանցել է նույն ուղերձը, ինչ ԱՄՆ թիմը փոխանցել է ուկրաինական պատվիրակությանն ու եվրոպացի դաշնակիցներին Փարիզում, այն է՝ նախագահ Թրամփը և Միացյալ Նահանգները ցանկանում են, որ այս պատերազմն ավարտվի, և այժմ բոլոր կողմերին ներկայացրել են կայուն և տևական խաղաղության ուրվագծերը։
Ասվում է, որ Փարիզում ԱՄՆ առաջարկի խրախուսական ընդունելությունը ցույց է տալիս, որ խաղաղությունը հնարավոր է, եթե բոլոր կողմերը հանձնառու լինեն համաձայնության հասնելուն։
ՌԴ ԱԳՆ-ն էլ հայտնել է, որ Լավրովը և Ռուբիոն քննարկել են ԱՄՆ ներկայացուցիչների՝ Ուկրաինայի, Ֆրանսիայի ու եվրոպական այլ երկրների հետ Փարիզում կայացած բանակցությունները։ Զրույցի ընթացքում ընդգծվել է, որ այս շփումները տեղի են ունեցել Վաշինգտոնի և Մոսկվայի միջև անցկացված խորհրդակցությունների թեմաներին համապատասխան, այդ թվում՝ Ռուսաստանի նախագահ Վլադիմիր Պուտինի և ԱՄՆ նախագահի հատուկ բանագնաց Սթիվ Ուիթկոֆի միջև Սանկտ Պետերբուրգում վերջերս կայացած զրույցին։
Լավրովը հաստատել է «Մոսկվայի պատրաստակամությունը շարունակել համագործակցությունը ամերիկացի գործընկերների հետ՝ ուկրաինական ճգնաժամի արմատական պատճառները հուսալիորեն վերացնելու համար»։
Ըստ ՌԴ ԱԳՆ-ի՝ կողմերը պայմանավորվել են պահպանել կապը, այդ թվում՝ «հաշվի առնելով ամերիկացիների և եվրոպացիների կողմից ուկրաինական կողմի հետ հաջորդ շաբաթ նախատեսված հանդիպումները»։
Հավելենք, որ ապրիլի 17-ին Փարիզում տեղի են ունեցել մի շարք հանդիպումներ ամերիկյան և ուկրաինական պատվիրակությունների, ինչպես նաև եվրոպական երկրների ներկայացուցիչների մասնակցությամբ։ Ֆրանսիական կողմը հայտնել է, որ Ֆրանսիայի, ԱՄՆ-ի, Մեծ Բրիտանիայի, Գերմանիայի և Ուկրաինայի ներկայացուցիչները համաձայնել են շարունակել հրադադարի շուրջ բանակցությունները հաջորդ շաբաթ Լոնդոնում։
Թարգմանությունը՝ Էմմա Չոբանյանի
