30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Թրամփը նախազգուշացրել է Իրանի դեմ հնարավոր ռազմական գործողությունների մասին՝ Իսրայելի ներգրավմամբ
Քաղաքականություն
10.04.2025 | 11:00
ԱՄՆ նախագահ Դոնալդ Թրամփը հայտարարել է, որ Իրանի դեմ հնարավոր ռազմական հարվածի «առաջնորդը» կլինի Իսրայելը, եթե Թեհրանը չհրաժարվի իր միջուկային զենքի ծրագրից, գրում է France 24-ը։
Թրամփը մեկնաբանություններն արել է ապրիլի 12-ին Օմանում ԱՄՆ-ի և Իրանի պաշտոնյաների մասնակցությամբ նախատեսված բանակցություններից առաջ։ Այս շաբաթվա սկզբին Թրամփը հայտարարել էր, որ բանակցությունները կլինեն «ուղղակի», մինչդեռ Իրանը դրանք որակել է որպես «անուղղակի» բանակցություններ ԱՄՆ-ի հետ։
«Եթե պահանջվում է ռազմական ուժ, մենք ռազմական ուժ կունենանք։ Իսրայելն ակնհայտորեն շատ ներգրավված կլինի դրանում։ Նրանք կլինեն դրա առաջնորդը»,- ասել է Թրամփը։
Իսրայելի վարչապետ Բենիամին Նեթանյահուն այս շաբաթվա սկզբին հայտարարել էր, որ աջակցում է Թրամփի դիվանագիտական ջանքերին՝ Իրանի հետ կարգավորման հասնելու համար: Նա հավելել էր, որ Իսրայելն ու ԱՄՆ-ն ունեն նույն նպատակը՝ ապահովել, որ Իրանը միջուկային զենք չզարգացնի: Այնուամենայնիվ, Նեթանյահուն գլխավորել է Թրամփին համոզելու ջանքերը՝ դուրս գալու 2018 թվականին Իրանի հետ ԱՄՆ-ի միջնորդությամբ կնքված համաձայնագրից:
Միացյալ Նահանգներն աստիճանաբար ավելի մտահոգված է, որ Թեհրանը ավելի, քան երբևէ մոտ է միջուկային զենքի ստեղծմանը։ Սակայն Թրամփը հայտարարել է, որ չունի բանակցությունների հստակ ժամանակացույց, որը կհանգեցնի խնդրի լուծման։
Միևնույն ժամանակ, ԱՄՆ ֆինանսների նախարարությունը չորեքշաբթի նոր պատժամիջոցներ է սահմանել Իրանի միջուկային ծրագրի դեմ։ Դրանցում նշվում են Իրանում գործող հինգ կազմակերպություններ և մեկ անձ՝ Իրանի միջուկային ծրագրին աջակցելու համար։
«Ես ուզում եմ, որ Իրանը մեծ լինի։ Միակ բանը, որ նրանք չեն կարող ունենալ, միջուկային զենքն է։ Նրանք դա հասկանում են»,- հայտարարել է Թրամփը։
Հիշեցնենք, որ Իրանի նախագահ Մասուդ Փեզեշքիանը նախօրեին հայտարարել էր, որ Թեհրանն ատոմային ռումբ չունի։
Թարգմանությունը՝ Էմմա Չոբանյանի
