09.10.2026 | 21:13
Ադրբեջանի դպրոցներում աշակերտները բողոքի ակցիաներ են անցկացրել հիջաբ կրելու արգելքի դեմ․ ՏԵՍԱՆՅՈՒԹ
Թրամփի օգնականներն Ուկրաինայի ընդդիմության հետ գաղտնի բանակցություններում ընտրությունների հարց են քննարկել․ Politico
Քաղաքականություն
06.03.2025 | 13:08
ԱՄՆ նախագահ Դոնալդ Թրամփի մերձավոր շրջապատի չորս բարձրաստիճան անդամներ գաղտնի բանակցություններ են վարել Ուկրաինայի նախագահ Վլադիմիր Զելենսկիի գլխավոր քաղաքական հակառակորդների հետ, երբ Վաշինգտոնը միացել է Ուկրաինայի նախագահին պաշտոնանկ անելու՝ Մոսկվայի ջանքերին, գրում է Politico-ն։
Ըստ ուկրաինացի երեք խորհրդարանականների և Հանրապետական կուսակցության արտաքին քաղաքական հարցերով փորձագետի՝ Թրամփի օգնականները բանակցություններ են անցկացրել ընդդիմության առաջնորդ Յուլիա Տիմոշենկոյի, նախկին նախագահ Պյոտր Պորոշենկոյի կուսակցության բարձրաստիճան անդամների հետ։ Քննարկումները կենտրոնացած են եղել հարցի շուրջ՝ արդյո՞ք Ուկրաինան կարող է արագ նախագահական ընտրություններ անցկացնել։
Թրամփի օգնականները վստահ են, որ Զելենսկին կկորցնի բոլոր ձայները պատերազմից հոգնածության և լայնածավալ կոռուպցիայից հասարակության զայրույթի պատճառով։ Սակայն վերջին հարցումը ցույց է տալիս, որ Զելենսկին մնում է բացահայտ առաջատար նախագահական մրցավազքում։
Բրիտանական Survation-ի կողմից Սպիտակ տանը տեղի ունեցած բանավեճից հետո անցկացված հարցման արդյունքներով՝ 44 տոկոսն ասել է, որ կաջակցի Զելենսկիին նախագահի պաշտոնում:
ԱՄՆ-ի համար հիմնական խնդիրը նախագահական ընտրությունների անցկացումն է ժամանակավոր հրադադարի համաձայնեցումից հետո, բայց մինչև խաղաղության լայնածավալ բանակցությունները սկսելը: Ե՛վ Տիմոշենկոն, և՛ Պորոշենկոն, ինչպես նաև Կիևի քաղաքապետ Վիտալի Կլիչկոն, հրապարակայնորեն դեմ են արտահայտվել ընտրությունների անցկացմանը մինչև մարտերի ավարտը:
Politico-ն գրում է, որ ըստ Թրամփի թիմակիցների՝ Տիմոշենկոն և Պորոշենկոն ավելի պատրաստ կլինեն փոխզիջումների գնալ, և նրանք կարող են համաձայնել շատ բաների, որոնց Զելենսկին չի համաձայնում։
Տիմոշենկոյի մամուլի քարտուղար Նատալյա Լիսովան, պատասխանելով Թրամփի վարչակազմի ներկայացուցիչների հետ բանակցությունների մասին լրատվամիջոցի հարցին, միայն շնորհակալություն է հայտնել Politico-ին հետաքրքրության համար։
«Առայժմ դա չենք մեկնաբանի»,- հավելել է նա։
Պորոշենկոյի կուսակցության մամուլի ծառայությունը հայտարարել է, որ իրենք ձգտում են ոչ թե նախագահական ընտրություններ անցկացնել, այլ «երկրում ապահովել ազատ և արդար մրցակցային հետպատերազմյան ընտրություններ»։
«Տրամաբանական է նաև, որ ցանկացած շփում ներառում է նախագահ Պորոշենկոյի և «Եվրոպական համերաշխություն» կուսակցության տեսլականի ներկայացումն այն մասին, թե ինչպես կարելի է ավարտել պատերազմը արդար, համապարփակ և տևական խաղաղությամբ և բանակցությունների սենյակներում հնարավոր փոխզիջումների սահմաններում»,- ասել են կուսակցությունից։
Լրատվամիջոցը կապ է հաստատել նաև Թրամփի շրջապատի չորս անդամների հետ, որոնք, ըստ աղբյուրների, ներգրավված են եղել քննարկումներում, սակայն անմիջապես պատասխան չեն ստացել:
Թարգմանությունը՝ Էմմա Չոբանյանի
