Քաղաքականություն
28.02.2025 | 15:18
Քրդական ուժերի հրամանատարը, որը վերահսկում է Սիրիայի հյուսիս-արևելքը, հայտարարել է, որ Թուրքիայում Քուրդիստանի աշխատավորական կուսակցության (PKK) բանտարկված առաջնորդ Աբդուլլահ Օջալանի՝ PKK-ի լուծարման ու զինաթափման կոչը չի վերաբերում իր ղեկավարած խմբին, գրում է Duvar-ը՝ վկայակոչելով Reuters-ին։
«Սիրիայի դեմոկրատական ուժերի» (SDF) հրամանատար Մազլում Աբդին ասել է, որ ողջունում է Աբդուլլահ Օջալանի պատմական կոչը PKK-ին՝ դադարեցնելու տասնամյակներ շարունակվող զինված պայքարը թուրքական պետության դեմ, ինչը, ըստ նրա, դրական հետևանքներ կունենա տարածաշրջանում։ Նա, սակայն, հավելել է, որ Օջալանի հայտարարությունը վերաբերում էր միայն PKK-ին ։
«Սիրիայում մեզ հետ կապ չունի այդ կոչը»,- ասել է նա։
Աբդիի մեկնաբանությունը պարզ է դարձնում, որ Օջալանի հայտարարությունն անմիջական ազդեցություն չի ունենա SDF-ի վրա՝ չնայած Քուրդիստանի աշխատավորական կուսակցության պատկանելությանը Սիրիայի հիմնական քրդական խմբավորումներին, որոնք կազմում են SDF-ի առանցքը՝ Ժողովրդական պաշտպանության միավորումները (YPG): Թուրքիան հայտարարում է, որ YPG-ն չի տարբերվում PKK-ից։
«Եթե Թուրքիայում խաղաղություն է, դա նշանակում է, որ այստեղ՝ Սիրիայում, մեզ վրա հարձակումները շարունակելու արդարացում չկա»,- ասել է Աբդին։
Աբդիի խմբավորումը վերահսկողություն է հաստատել Սիրիայի հյուսիսում գտնվող քրդական շրջանների վրա 2011 թվականին՝ սիրիական քաղաքացիական պատերազմի բռնկումից հետո, և հետագայում դարձել ԱՄՆ-ի գլխավոր գործընկերը ԻԼԻՊ-ի դեմ պայքարում՝ ընդլայնելով իր վերահսկողության տակ գտնվող տարածքը:
SDF-ը քիչ հակամարտություններ ուներ սիրիական բանակի հետ՝ այն ժամանակվա նախագահ Բաշար Ասադի օրոք: Հիմա, սակայն, բախվում է խնդիրների Դամասկոսի նոր վարչակազմի կողմից։ Թուրքիան Սիրիայի նոր վարչակազմի գլխավոր աջակիցներից է։
Թարգմանությունը՝ Էմմա Չոբանյանի
