06.10.2026 | 18:30
Ալեն Սիմոնյանն ընդունել է Հայաստանում դիվանագիտական առաքելությունն ավարտող Լյուքսեմբուրգի դեսպանին
Ուկրաինան ջնջելու և ինքնությունը ոչնչացնելու փորձեր. 3 տարի ձգվող պատերազմի վավերագրությունը. ՏԵՍԱՆՅՈՒԹ
24.02.2025 | 22:00
Այսօր՝ փետրվարի 24-ին, լրանում է ռուս-ուկրաինական պատերազմի մեկնարկի երրորդ տարին։
Հայաստանում Ուկրաինայի դեսպանությունն այսօր կազմակերպել էր միջոցառում և ֆիլմի ցուցադրություն, ներկայացվեց լրագրող Անժելա Սլոբադյանի հեղինակած «Նավալա» ֆիլմը։
Ռեժիսոր, «Հուշարար արվեստից կենտրոնի» նախագահ Գարս Խաչատրյանը FactorTV-ի հետ զրույցում պատմեց, որ ֆիլմում ներկայացվում են Ռուսաստանի՝ Ուկրաինա ներխուժման առաջին օրերին ծավալվեղ իրադարձությունները, հատկապես՝ Խերսոնի մարզում։
Պատերազմի ընթացքում Գարս Խաչատրյանը 12 անգամ այցելել է Ուկրաինա և ինքը ևս վավերագրել է ռազմական գործողությունները։
Նախքան ֆիլմի ցուցադրությունը Հայաստանի Հանրապետությունում Ուկրաինայի գործերի ժամանակավոր հավատարմատար Վալերի Լոբաչը բացման խոսքով հանդես եկավ։ Վալերի Լոբաչը հիշեցրեց, թե այս ընթացքում Ռուսաստանի չարդարացված ագրեսիան ինչ դրսևորումներ է ունեցել։
Նա հայտարարեց, որ Ուկրաինան երկրի երեսից ջնջելու և իրենց ինքնությունը ոչնչացնելու Ռուսաստանի փորձելը ձախողվել են։
«Ուկրաինայի ժողովուրդը շարունակում է պայքարել ոչ միայն իր գոյատևման, ինքնիշխանության, պետականության, այլև՝ արդարության և ազատության իդեալների համար։ Վերջին երեք տարիների ընթացքում մենք ցույց ենք տվել մեր կարողությունը՝ դիմակայելու թշնամուն, որը ռեսուրսներով գերազանցում է մեզ։ Մեր ուժը մեր ժողովրդի միասնության, մեր հոգու տոկունության և մեր միջազգային գործընկերների շարունակական աջակցության մեջ է»,- հավելեց Վալերի Լոբաչը։
Հիշեցնենք, որ 2022 թվականի փետրվարի 22-ին ՌԴ նախագահ Վլադիմիր Պուտինը հայտարարեց Դոնեցկի և Լուգանսկի անկախությունը ճանաչելու մասին։
Դրանից երկու օր անց Ռուսաստանն Ուկրաինայում սկսեց ռազմական օպերացիա․ Պուտինն այդ գործողությունները պաշտոնապես անվանեց «հատուկ ռազմական գործողություն»։
Պատերազմի օրերին ռուսական բանակը հարձակում սկսեց Ուկրաինայի մայրաքաղաք Կիևի և մի շարք այլ խոշոր քաղաքների, բնակավայրերի վրա։
Ռազմական գործողություններից ամիսներ անց Ռուսաստանը հայտարարեց Ուկրաինայի չորս շրջանների՝ Դոնեցկի, Լուգանսկի, Խերսոնի և Զապորոժիեի միացման մասին՝ իբրև ՌԴ նոր տարածաշրջաններ։
Պատերզմից երեք տարի անց, օրեր առաջ առաջ Վլադիմիր Զելենսկին հայտարարեց, թե Ռուսաստանի հետ պատերազմում զոհվել է մոտ 45 հազար 100 ուկրաինացի զինվոր, վիրավորվել՝ 390 հազարը, իսկ հակառակորդ Ռուսաստանը կորցրել է 300-350 հազար զինվոր, իսկ վիրավորների առավելագույն թիվը՝ 700 հազար։
Մանրամասները՝ տեսանյութում։
