Սիրիայի անցումային նախագահը Թուրքիա է ժամանել. նրան ընդունել է Էրդողանը

Սիրիայի անցումային նախագահ Ահմեդ ալ-Շարաան և արտաքին գործերի նախարար Ասադ ալ-Շայբանին առաջին պաշտոնական այցով ժամանել են Թուրքիա՝ նշանավորելով սիրիական նոր վարչակազմի երկրորդ դիվանագիտական այցը արտասահման, հայտնում է Turkiye Today-ը։

Առաջին այցը Շարաան կատարել էր Սաուդյան Արաբիա։

Սիրիայի նախագահի օդանավը վայրէջք է կատարել Անկարայի Էսենբողա օդանավակայանում։

Ալ-Շարաային Անկարայի նախագահական համալիրում ընդունել է Թուրքիայի նախագահ Ռեջեփ Թայիփ Էրդողանը։ Երկկողմ հանդիպումից և պատվիրակությունների աշխատանքային ընթրիքից հետո Էրդողանն ու Շարաան հանդես կգան համատեղ մամուլի ասուլիսով։

Ավելի վաղ Reuters-ը գրել էր, որ ասվում է, որ Ահմեդ ալ-Շարաան Էրդողանի հետ քննակելու է  համատեղ պաշտպանական պայմանագիրը, որը ներառում է թուրքական ավիաբազաների ստեղծում Կենտրոնական Սիրիայում և Սիրիայի նոր բանակի ուսուցում։ ՆԱՏՕ-ի անդամ Թուրքիան երկար ժամանակ սատարում է Սիրիայի զինված և քաղաքական ընդդիմությանը, որը գահընկեց արեց Բաշար Ասադին դեկտեմբերի վերջին Շարաայի ուժերի կողմից գլխավորած կայծակնային հարձակման արդյունքում:

Աղբյուրները նշում են, որ համաձայնագրի համաձայն՝ Թուրքիան կարող է նոր ավիաբազաներ ստեղծել Սիրիայում, օգտագործել Սիրիայի օդային տարածքը ռազմական նպատակներով և առաջատար դեր ստանձնել սիրիական նոր բանակում զորքերի պատրաստման գործում։ Միաժամանակ, նշվում է, որ գործարքը չի ակնկալվում ավարտին հասցնել երեքշաբթի:

Տարածաշրջանային հետախուզության ներկայացուցիչը, սիրիական անվտանգության պաշտոնյան և Դամասկոսում գործող արտաքին անվտանգության աղբյուրներից մեկը հայտնել են, որ բանակցությունները կներառեն երկու թուրքական բազաների ստեղծում Սիրիայի կենտրոնական անապատի հսկայական շրջանում, որը հայտնի է որպես Բադիյա: Աղբյուրները նաև նշել են, որ քննարկվող բազաները Թուրքիային թույլ կտան պաշտպանել Սիրիայի օդային տարածքը ապագա հարձակումների դեպքում:

Սիրիայի նախագահության պաշտոնյան Reuters-ին ասել է, որ Շարաան Էրդողանի հետ կքննարկի նաև Թուրքիայի կողմից «սիրիական նոր բանակի վերապատրաստման, ինչպես նաև տեղակայման և համագործակցության նոր ոլորտները»՝ առանց տեղակայման վայրերը հստակեցնելու:

Հավելենք, որ ավելի վաղ թուրքական լրատվամիջոցներին էին հայտնել, որ Անկարան ծրագրում է Սիրիայում երկու ռազմաբազա ստեղծել։

Թարգմանությունը՝ Էմմա Չոբանյանի