Թուրքիան ծրագրում է Սիրիայում երկու ռազմաբազա ստեղծել․ առաջիկայում Դամասկոսին թուրքական ԱԹՍ-ներ կմատակարարվեն

Սիրիայում Բաշար Ասադին տապալած ընդդիմադիր կառավարությունը լիովին թարմացնում է ռազմական և անվտանգության դոկտրինը: Թուրքական Turkiye պարբերականը հայտնում է, որ Սիրիայի նոր ղեկավար  Ահմեդ ալ-Շարաայի վարչակազմը, որըն ինտենսիվ դիվանագիտության և համագործակցության կամուրջ է ստեղծել Անկարայի հետ, մի շարք պահանջներ է ներկայացրել սահմանային անվտանգության, ինչպես նաև բանակի վերակառուցման վերաբերյալ:

Դամասկոսի կառավարությունը, որի հիմնական պահանջն Անկարայից անօդաչու թռչող սարքերն են, ցանկանում է, որ սահմանի երկայնքով տեղակայվեն լրացուցիչ ռադարներ, էլեկտրոնային միջոցներ և անվտանգության ինտեգրված համակարգեր, հատկապես, Իսրայելի սահմանային միջանցքը վերահսկելու համար: Սիրիայի պաշտպանության նախարարության պաշտոնյան լրատվամիջոցին հայտնել է, որ մոտ ապագայում տեղի կունենա առաջին թուրքական անօդաչու թռչող սարքերի առաքումը։

«Թուրքիայի հակաօդային պաշտպանության տեխնոլոգիան մեծ նշանակություն ունի ահաբեկչական PKK/YPG կազմակերպության սպառնալիքի վերացման և դրանից հետո հնարավոր ահաբեկչական ներթափանցումների դեմ, ինչպես նաև Իսրայելի օկուպացիայի և խախտումների առումով»,- ասել է աղբյուրը՝ նշելով, որ վերջին օրերին թուրք գեներալ Իլքայ Ալթընդաղի գլխավորած այցերի ընթացքում քննարկվել են բազմաթիվ տեխնիկական մանրամասներ, թե որտեղ և ինչպես է տեղակայվելու թուրքական ծագման տեխնոլոգիան։

Լրատվամիջոցը նաև գրում է, որ Թուրքիան այդ երկրի բանակը կպատրաստի երկու ռազմաբազաներում, որոնք հիմնելու է Սիրիայում։

Արաբական աղբյուրների համաձայն՝ Թուրքիան և Սիրիան համատեղ պաշտպանության համաձայնագիր են ստորագրելու։ Ըստ համաձայնագրի, որը նախատեսվում է ստորագրել մոտ ժամանակներս, Անկարան կօգնի Սիրիային, եթե Դամասկոսը հանկարծակի վտանգի առաջ կանգնի։ Համաձայնագրով նախատեսվում է նաև, որ թուրքական զինված ուժերը կվերապատրաստեն սիրիական բանակն ու օդաչուներին։ Համաձայնագրի մյուս կետն էլ ենթադրում է, որ Թուրքիան 50 F-16 կործանիչներ կտեղակայի այդ բազաներում՝ կանխելու ցանկացած հարձակում, որը կարող է թիրախավորել երկրի ինքնիշխանությունը, քանի դեռ Սիրիայի ռազմաօդային ուժերը չեն ձևավորվել։

Թարգմանությունը՝ Էմմա Չոբանյանի