Բրազիլիան ադրբեջանական կործանված օդանավի «սև արկղերի» տվյալները փոխանցել է Ղազախստանին

Բրազիլիայի ռազմաօդային ուժերը հայտնել են, որ վերծանել են «Ադրբեջանական ավիաուղիների» կործանված օդանավի երկու սև արկղերի տվյալները, գրում է AFP-ը։

Նշվում է, որ թռիչքի ինքնագրիչները, որոնք ֆիքսում են օդաչուների խցիկի խոսությունը և օդանավի թռիչքի տվյալները, վերլուծվել են Բրազիլիայում, սակայն արդյունքների հրապարակման համար պատասխանատու է Ղազախստանը:

«Բոլոր տվյալները փոխանցվել են Ղազախստանի քննչական մարմնին՝ օդանավերի վթարների հետաքննության միջազգային արձանագրություններին համապատասխան»,- ասվում է Բրազիլիայի ռազմաօդային ուժերի հայտարարության մեջ:

Բրազիլական արտադրության Embraer 190 ինքնաթիռը վթարային վայրէջք էր կատարել Ղազախստանում՝ Չեչնիայի մայրաքաղաք Գրոզնիում նախատեսված վայրէջքից շեղվելուց հետո, ինչի հետևանքով զոհվել է օդանավում գտնվող 67 անձից 38-ը: Ադրբեջանը կարծում է, որ ինքնաթիռը խոցվել է ռուսական հակաօդային պաշտպանության կողմից, որը, ըստ Մոսկվայի, այն ժամանակ գործում էր այդ տարածքում:

ՌԴ նախագահ Վլադիմիր Պուտինը ներողություն է խնդրել, որ «միջադեպը» տեղի է ունեցել իր երկրի օդային տարածքում, սակայն չի արձագանքել պնդումներին, որ օդանավը խոցվել է ռուսական զենքից։

Ադրբեջանի նախագահ Իլհամ Ալիևը պահանջել է ներողություն խնդրել, ընդունել մեղքը և պատժել ինքնաթիռի «հանցավոր» խոցման համար մեղավորներին։ Ալիևն ասել է, որ Ռուսաստանի կողմից պատճառների «քողարկումը» և «զառանցական վարկածների» քարոզումն «արդարացված զայրույթ է առաջացնում»:

Թարգմանությունը՝ Էմմա Չոբանյանի