20.02.2026 | 14:14
Պուտինը ՌԴ ԱԳ փոխնախարարին Թուրքիայում դեսպան է նշանակել
Սալոմե Զուրաբիշվիլին ելույթ է ունեցել Եվրախորհրդարանում
Քաղաքականություն
18.12.2024 | 21:03
Վրաստանի նախագահ Սալոմե Զուրաբիշվիլին ելույթ է ունեցել Եվրախորհրդարանում՝ անդրադառնալով հոկտեմբերի 26-ի ընտրությունների խախտումների, իշխող «Վրացական երազանք» կուսակցության ռուսամետ քայլերի և ԵՄ ինտեգրումից շեղվելու մասին, որի դեմ վրացիները շաբաթներ շարունակ բողոքում են։ Իր ելույթում նա նաև քննադատել է ԵՄ-ին իշխող ռեպրեսիվ քայլերի դեմ գործելու դանդաղության համար և կոչ է արել երկրում նոր ընտրություններ անցկացնել։
«Ներկայիս գործընթացն իր էությամբ հեղափոխական շարժում չէ, քանի որ որևէ մեկին կամ որևէ ուժի տապալելու պահանջ չկա։ Դա վերաբերում է վերադարձին դեպի ազատ և արդար միջավայրում ընտրություններ»,-ասել է նա՝ նշելով, որ ցուցարարները փողոցում են արդեն 21 օր։
«Սա շատ հետաքրքիր շարժում է, որը սկզբում սկսվեց գիշերը, հետո շարունակվեց ցերեկը։ Այս շարժումը ներառում է բնակչության տարբեր շերտեր, իսկ այժմ այն գործնականում ընդգրկում է ողջ հասարակությունը։ Անկեղծ ասած, սա վերաբերում է ոչ միայն այս 21 օրվան։ Բողոքի ակցիան սկսվել է խորհրդարանական ընտրություններից հետո։ Բողոքի ակցիաներ եղան նաև այս տարվա գարնանը, երբ նորից մտցվեց ռուսական օրենքը։ Բողոքի ակցիաներ եղան նաև անցյալ տարվա գարնանը, երբ առաջին անգամ ներկայացվեց ռուսական օրենքը։ Այդ բողոքի ցույցերը միշտ հատուկ են եղել և բնորոշ են Վրաստանին այն պահերին, երբ վրացի ժողովուրդը վտանգ է զգում իր ազատության, եվրոպական ուղու և անկախության համար»,- ասել է Զուրաբիշվիլին՝ նշելով, որ երկրում ցույցերը խաղաղ են անցնում։
«Վրաստանում սոցիալական պայմանների դեմ բողոքի ցույցեր երբեք չեն եղել, և դրա համար կան պատճառներ, քանի որ այս առումով իրավիճակը նվազագույնը անբավարար է։ Այնուամենայնիվ, միակ դեպքը, երբ մարդիկ զանգվածաբար դուրս են գալիս փողոց, այն է, երբ նրանք զգում են, որ դրված են գոյաբանական հարցերը: Սա հենց այն է, ինչի հետ մենք հիմա գործ ունենք։ Բողոքի այս շարժումը շատ խաղաղ է, քաղաքացիական անհնազանդության շարժում է, և դրա մասնակիցները միայն երկու բան են պահանջում՝ վերադարձրեք՛ իմ ձայնը, քանի որ ընտրությունները գողացել են։ Վերադարձրե՛ք իմ եվրոպական ապագան, և դա արտահայտվում է նոր ընտրությունների պահանջով»,- ասել է Վրաստանի նախագահը։
Թարգմանությունը՝ Էմմա Չոբանյանի
