19.04.2026 | 15:20
Լատվիան և Լիտվան թույլ չեն տա Ֆիցոյին օգտագործել իրենց օդային տարածքը՝ Մոսկվա թռչելու ու շքերթին մասնակցելու համար
«Դժվար եմ ընդունել ինքս ինձ». անմատչելի և խտրական Երևանը՝ 17-ամյա Աշոտի աչքերով․ ՏԵՍԱՆՅՈՒԹ
Հասարակություն
03.12.2024 | 20:03
17-ամյա Աշոտ Հովհաննիսյանի առօրյան քիչ է տարբերվում իր հասակակիցների առօրյայից․ հիմնական տարբերությունն այն է, որ ամենապարզ թվացող գործողությունները շատ հաճախ իսկական մարտահրավեր են դառնում նրա համար։
Ի ծնե հաշմանդամություն ունեցող Աշոտին ավելի քան մեկ տասնամյակ է անհրաժեշտ եղել իր խնդրի հետ համերաշխ ապրելու համար։ Թեև Աշոտը կարողացել է ժամանակի ընթացքում ինքն իր հետ ներդաշնակ ապրել, դպրոցական կյանքից մնացած մի քանի դառը հուշերը մինչ օրս նրա հիշողության մեջ են։
Դժվարություններին և խտրականությանը բախվելն է պատճառ դարձել, որ Աշոտն այսօր սոցկայքերում բլոգ է վարում, անդրադառնում է հաշմանդամություն ունեցող անձանց խնդիրներին, տեղաշարժման դժվարություններին ու օր-օրի ավելացող մարտահրավերներին։
Սայլակով տեղաշարժվող անձինք Երևանում դժվարությունների են հանդիպում գրեթե ամենուր։ Եվ մինչ Աշոտը բարձրաձայնում է, թե ինչ գործողություններ պետք է կատարի իշխանությունը հաշմանդամություն ունեցող անձանց համար քաղաքը մատչելի դարձնելու համար, պարզվում է՝ 2023 թվականի ընթացքում ՀՀ քաղաքաշինության, տեխնիկական և հրդեհային անվտանգության տեսչական մարմինը բնակչության մատչելիության նորմերի խախտումների ընդամենը 2 դեպք է արձանագրել։
Հայաստանում շենք-շինությունների անմատչելիությանը երեկ անդրադարձ կատարվեց նաև վարչապետի մակարդակով։ Նիկոլ Փաշինյանի դիտարկմամբ՝ ՀՀ-ում պատկերն այդքան էլ սփոփիչ չէ։
Իսկ ի՞նչ օրենսդրական փոփոխություններ են անհրաժեշտ հաշմանդամություն ունեցող անձանց իրավունքների լիարժեք պաշտպանության և նրանց ներգրավվածության բարձրացման համար։ Իշխող ուժի պատգամավոր Զարուհի Բաթոյանը, որը նույնպես հաշմանդամություն ունի, կարծում է՝ պետք է այնպիսի պայմաններ ստեղծվեն, որ ցանկացած քաղաքացի հավասար պայմաններում լինի։
Շեշտում է՝ թեև ժամանակի ընթացքում հանրության մոտ կամաց-կամաց նվազում է հաշմանդամություն ունեցող անձանց տարբերակված մոտեցում ցուցաբերելը կամ, այսպես ասած, տարօրինակ աչքով նայելը, Հայաստանում նրանք չեն կարողանում լիարժեք իրացնել իրենց իրավունքները։
Դեկտեմբերի 3-ը հաշմանդամություն ունեցող անձանց միջազգային օրն է։
Մանրամասները՝ տեսանյութում։
Ռոզա Վարդանյան
