06.10.2026 | 18:30
Ալեն Սիմոնյանն ընդունել է Հայաստանում դիվանագիտական առաքելությունն ավարտող Լյուքսեմբուրգի դեսպանին
Խոսքի ազատության բարելավում, հավաքների ոլորտում՝ վատթարացում․ «ՔՀԿ չափիչ 2024»-ի արդյունքները․ ՏԵՍԱՆՅՈՒԹ
Քաղաքականություն
28.11.2024 | 21:50
Խոսքի ազատության ոլորտում որոշակի բարելավում, հավաքների ազատության ոլորտում՝ վատթարացում․ «ՔՀԿ չափիչ Հայաստան 2024» ուսումնասիրության արդյունքներով Հայաստանում քաղաքացիական հասարակության կազմակերպությունների միջավայրի ընդհանուր գնահատականը չի փոխվել՝ առավելագույն 7-ից 4,8 միավոր: Ցուցանիշները 11 ոլորտներից 9-ում նույնն են մնացել, փոխարենն էական ազդեցություն են ունեցել այս տարեսկզբից անցկացված բողոքի ակցիաները և հանրահավաքները։
Քաղաքացիական հասարակության կազմակերպությունների միջավայրի հետազոտություններն իրականացվում են 2019 թվականից։
Հետազոտությունն իրականացրած Թրանսփարենսի ինթերնեշնլ հակակոռուպցիոն կենտրոնի ղեկավար Սոնա Այվազյանը շեշտում է՝ արդեն 4 տարի է՝ ոչ միայն ուսումնասիրություն են իրականացնում, այլև դրա հիման վրա գնահատականներ են կարողանում տալ և համեմատություն անցկացնել նախորդ տարիների հետ։
Հետազոտություն իրականացրած խմբի անդամ Տաթևիկ Ղարիբյանի թեև նշում է, որ Ոստիկանության Գվարդիայի մասին օրենքի ընդունումը դրական կարող է ազդել, քանի որ դրա հիմնական գործառույթներից է լինելու հավաքի մասնակիցների իրավունքների պաշտպանությունը, այնուամենայնիվ, շեշտում է՝ այս տարի ոստիկանների կողմից բավականին բիրտ ուժ գործադրվեց հավաքների մասնակիցների և լրագրողների նկատմամբ։
«Պետական մարմինները բոլոր իրավական ակտերի նախագծեր ունենալուց դրանք նախապես կհամաձայնեցնեն Անձնական տվյալների պաշտպանության գործակալության գրասենյակի հետ»,- նման առաջարկություն է ներկայացնում հետազոտության անդամ Էլինա Գյուրջյանը։
ԹԻՀԿ ղեկավար Սոնա Այվազյանը Իրավական նախագծերի ակտերի նախագծերի հրապարակման միասնական e-draft կայքում մի շարք կարևոր փոփոխություններ է առաջարկում։
2019 թվականից ի վեր ուսումնասիրված 11 ոլորտներից ամենացածր միավորը մշտապես պետություն-ՔՀԿ համագործակցությանն է բաժին ընկել։ Ավելին, «Իրավունքների պաշտպանություն առանց սահմանների» ՀԿ նախագահ Արաքս Մելքոնյանը բարձրաձայնում է նաև հասարակական կազմակերպությունների նկատմամբ պետության կողմից խտրական վերաբերմունքի մասին։
Մոտ 40 կետից բաղկացած առաջարկությունների ցուցակում այս հարցին ևս անդրադարձ է կատարվել։
Հայաստանում ՔՀԿ միջավայրի ամենաբարձր գնահատականներն ունեցող երեք ոլորտները գրեթե նույնն են, ինչ նախորդ տարիներին՝ միավորումների ազատություն 5,7 միավոր, ֆինանսավորման մատչելիություն՝ 5,3 և խաղաղ հավաքների ազատություն՝ 5,3 միավոր, իսկ ամենացածր գնահատված ոլորտներն են պետություն-ՔՀԿ համագործակցությունը՝ 4,0 միավոր, պետական աջակցությունը՝ 4,1 միավոր, պետության կողմից պաշտպանության պարտականությունը՝ 4,5 միավոր և թվային իրավունքները՝ 4,5 միավոր:
Մանրամասները՝ տեսանյութում։
Ռոզա Վարդանյան
