ԵՄ-ն պատժամիջոցներ է սահմանել նավագնացային ընկերությունների դեմ՝ ՌԴ-ին իրանական զենք մատակարարելու համար

Եվրամիությունը պատժամիջոցներ է սահմանել ռուսական և իրանական բեռնափոխադրող ընկերությունների դեմ, որոնք զբաղվում են իրանական զենքի մատակարարմամբ, որը Պուտինի բանակն օգտագործում է Ուկրաինայի դեմ պատերազմում։ ԵՄ-ն սև ցուցակում է ներառել The Islamic Republic of Iran Shipping Line Group (IRISL)-ին և դրա տնօրենին, ինչպես նաև երեք ռուսական ընկերությունների՝ «ՄԳ-Ֆլոտ», «ՎՏՍ-բրոկեր» և «Արապակս», հաղորդվում է Եվրոպական խորհրդի կայքում:

IRISL նավերը երկար տարիներ անօդաչու թռչող սարքեր են մատակարարել ԵՄ-ի կողմից պատժամիջոցների տակ գտնվող Իսլամական հեղափոխության պահապանների կորպուսի նավատորմի համար, ասվում է հայտարարության մեջ:

Ինչ վերաբերում է ռուսական ընկերություններին, ապա դրանք «ներգրավված են իրանական արտադրության զենքի և զինամթերքի, ներառյալ՝ անօդաչու թռչող սարքերի բաղադրիչները Կասպից ծովով տեղափոխելու գործում՝ Ուկրաինայում կռվող ռուսական զորքերը համալրելու համար»:

ԵՄ բնակիչներին արգելվում է համագործակցել կամ գործարքներ կատարել այդ ընկերությունների հետ՝ թույլ տալով նրանց նավերին մուտք գործել նավահանգիստներ կամ մատուցել այլ ծառայություններ: Սահմանափակիչ միջոցներ են մտցվել՝ «կապված Ուկրաինայի, ինչպես նաև Մերձավոր Արևելքի և Կարմիր ծովի տարածաշրջանի զինված խմբավորումների դեմ Ռուսաստանի զավթողական պատերազմին Իրանի ռազմական աջակցության հետ»:

Պատժամիջոցներն ուղղված են «կանխելու նավերի և նավահանգիստների օգտագործումն իրանական արտադրության անօդաչու թռչող սարքերի, հրթիռների և հարակից տեխնոլոգիաների ու բաղադրիչների տեղափոխման համար», պարզաբանում է Եվրոպական խորհուրդը։

Թարգմանությունը՝ Տաթև Ֆռանգյանի