17.12.2025 | 11:33
Տեր Շտեգենը վերադարձել է խաղադաշտ ու մասնակցել «Բարսելոնայի» հաղթանակին․ ՏԵՍԱՆՅՈՒԹ
Արդյո՞ք Պապիկյանը ևս հրաժարական կտա․ խոսնակի մեկնաբանությունը
18.11.2024 | 12:23
Հաշվի առնելով Կառավարության նոյեմբերի 14-ի նիստում ուժային ու իրավապահ կառույցների աշխատանքից Փաշինյանի արտահայտած դժգոհությունը և բարձրաստիճան մի շարք պաշտոնյաների հրաժարականները՝ Factor.am-ը Պաշտպանության նախարարի մամուլի խոսնակից հետաքրքրվեց՝ արդյո՞ք Սուրեն Պապիկյանը կշարունակի պաշտոնավարել։
«Պաշտպանության նախարարի հրաժարականի մասին տեղեկությունները չեն համապատասխանում իրականությանը»,- Factor.am-ի հարցին ի պատասխան ասաց Արամ Թորոսյանը։
Հիշեցնենք՝ Սուրեն Պապիկյանը Հայաստանի պաշտպանության նախարար է նշանակվել 2021 թվականի նոյեմբերի 15-ին՝ այդ պաշտոնում փոխարինելով Արշակ Կարապետյանին։ Պապիկյանը եղել է նաև փոխվարչապետ, Տարածքային կառավարման և ենթակառուցվածքների նախարար։ Պապիկյանը իշխող «Քաղաքացիական պայմանագիր» կուսակցության վարչության անդամ է։
Հավելենք, որ Կառավարության վերջին նիստում վարչապետ Նիկոլ Փաշինյանը կոշտ գնահատական տվեց իրավապահ համակարգի գործունեությանը՝ ընդգծելով, որ իր համբերության բաժակը լցվել է։
«Իմ համբերության բաժակը լցվել է, ոնց որ քյասիբի ռադիո լինեմ. գալիս եմ ձեր բոլորի միջոցառումներին, ելույթ եմ ունենում, խոսում եմ, դուք էլ ծափ եք տալիս, ես թողնում, գնում եմ, հետո հաջորդ տարի էլի գալիս եմ, նույն ելույթն եմ ունենում, դուք ավելի ուժեղ եք ծափ տալիս, ես թողնում, գնում եմ։ Ուզում եմ հասկանալ` ո՞վ ա ում ձեռ առնում։ Ես ուղիղ եմ ասում` սրա վերջը եկել է»,- իր խոսքում նշել էր Փաշինյանը։
Այսօր էլ Փաշինյանը գրել է, որ մի շարք բարձրաստիճան պաշտոնյաների խնդրել է թողնել զբաղեցրած պաշտոնները՝ ընդծելով, որ պատճառները ոչ թե անձնավորված են, այլ համակարգային։ Արդեն իսկ հրաժարականի դիմումներ են ներկայացրել ԲԴԽ նախագահ Կարեն Անդրեասյանը, Քննչական կոմիտեի նախագահ Արգիշտի Քյարամյանը, Հակակոռուպցիոն կոմիտեի նախագահ Սասուն Խաչատրյանը, Ներքին գործերի նախարար Վահե Ղազարյանը։ ՊԵԿ նախագահ Ռուստամ Բադասյանի և ՏԿԵ նախարար Գնել Սանոսյանի հրաժարականի մասին տեղեկությունները դեռևս պաշտոնապես չեն հաստատվել։
Արփի Հակոբյան
