06.10.2026 | 17:09
Խուդաթյանը հանձնարարել է խստացնել ճանապարհաշինական աշխատանքների որակի վերահսկողությունը
Սասուն Խաչատրյանը հրաժարականի դիմում է ներկայացրել. Կոմիտեն պաշտոնապես հաստատեց
Քաղաքականություն
18.11.2024 | 09:50
Հակակոռուպցիոն կոմիտեի նախագահ Սասուն Խաչատրյանը հրաժարականի դիմում է ներկայացրել։ Տեղեկությունը պաշտոնապես հաստատեց Կոմիտեի մամուլի քարտուղար Մարինա Օհանջանյանը՝ զերծ մնալով այլ մանրամասներից։
Հիշեցնենք՝ երեկ երեկոյան FactorTV-ի աղբյուրներն արդեն իսկ հաստատել էին Խաչատրյանի հրաժարականի մասին տեղեկությունները։
Ազատման դիմումներ են ներկայացրել նաև ՆԳ նախարար Վահե Ղազարյանը, ՏԿԵ նախարար Գնել Սանոսյանը, ՔԿ նախագահ Արգիշտի Քյարամյանը, ՊԵԿ նախագահ Ռուստամ Բադասյանը և ԲԴԽ նախագահ Կարեն Անդրեասյանը։
Կառավարության վերջին նիստի ժամանակ վարչապետ Նիկոլ Փաշինյանը բավական վրդովված անդրադարձ էր կատարել իրավապահ համակարգին՝ շեշտելով՝ իր համբերության բաժակը լցվել է. «Իմ համբերության բաժակը լցվել է, ոնց որ քյասիբի ռադիո լինեմ. գալիս եմ ձեր բոլորի միջոցառումներին, ելույթ եմ ունենում, խոսում եմ, դուք էլ ծափ եք տալիս, ես թողնում, գնում եմ, հետո հաջորդ տարի էլի գալիս եմ, նույն ելույթն եմ ունենում, դուք ավելի ուժեղ եք ծափ տալիս, ես թողնում, գնում եմ։ Ուզում եմ հասկանալ` ո՞վ ա ում ձեռ առնում։ Ես ուղիղ եմ ասում` սրա վերջը եկել է»,- իր խոսքում նշել էր Փաշինյանը։
