Գերմանիայում հայտարարել են իշխող կոալիցիայի փլուզման մասին

Գերմանիայի կանցլեր Օլաֆ Շոլցը պաշտոնանկ է արել ֆինանսների նախարար Քրիստիան Լինդներին, որը Գերմանիայի Ազատ դեմոկրատական կուսակցության (FDP) նախագահն է։ Այն Գերմանիայի Սոցիալ-դեմոկրատական կուսակցության (SDP) կոալիցիայի մաս է։ Քրիստիան Լինդների հրաժարականը հաստատել է կառավարության խոսնակ Շտեֆեն Հեբեշտրեյթը։

Գերմանական Bild-ը, հղում անելով սեփական աղբյուրներին, գրում է, որ Օլաֆ Շոլցն առաջ է անցել FDP-ից. նոյեմբերի 6-ի երեկոյան FDP-ն ծրագրում էր դուրս գալ կոալիցիոն հանձնաժողովից, իսկ նոյեմբերի 7-ին՝ խզել կոալիցիոն համաձայնագիրը և հետ կանչել իր նախարարներին։

Գերմանական Deutsche Welle-ի փոխանցմամբ՝ նոյեմբերի 6-ին Բեռլինում կայացած կոալիցիոն հանձնաժողովի նիստում Քրիստիան Լինդներն առաջարկել է կոալիցիոն գործընկերներին համաձայնել երկրում արտահերթ խորհրդարանական ընտրություններ անցկացնել 2025 թվականի սկզբին։ Այդ դեպքում նա պատրաստ կլիներ ընդունել Գերմանիայի լրացուցիչ բյուջեն 2024 թվականի համար և մնալ անցումային կաբինետի կազմում մինչև խորհրդարանական ընտրությունների անցկացումն ու Գերմանիայի նոր դաշնային կառավարության ձևավորումը։ Ի պատասխան՝ Գերմանիայի կանցլեր Օլաֆ Շոլցը հայտարարել է Լինդների պաշտոնանկության մասին։

Շոլցը նաև Բունդեսթագում քվեարկության կդնի իր վստահության հարցը։ Քվեարկությունը տեղի կունենա 2025 թվականի հունվարի 15-ին։ Հաղորդվում է, սակայն, որ առանց ամբողջ կոալիցիայի ձայների նա չի կարող նման վստահություն ձեռք բերել, ինչը նշանակում է Բունդեսթագի մոտալուտ լուծարում։

Գերմանիայում արտահերթ ընտրությունները կարող են տեղի ունենալ արդեն 2025 թվականի մարտին, գրում է DW-ն։

Գերմանական մամուլն ավելի վաղ գրել էր, որ Օլաֆ Շոլցի իշխող կոալիցիան կարող է փլուզվել։ Նոյեմբերի սկզբին լրատվամիջոցները ձեռք էին բերել ֆինանսների նախարար Քրիստիան Լինդների գաղափարներով փաստաթուղթ, որում նա պահանջում էր «տնտեսության վերագործարկում»։

Թարգմանությունը՝ Տաթև Ֆռանգյանի